Os I Premios da Industria Musical de Galicia xa teñen gañadoras e gañadores
A Asociación Galega de Empresas Musicais (AGEM), co apoio da Xunta de Galicia —a través da Axencia Galega das Industrias Culturais (Agadic)— e da Deputación da Coruña, celebrou este xoves 27 de novembro a gala da primeira edición dos Premios da Industria Musical de Galicia. O encontro, que comezou ás 19:30 horas na Sala Capitol de Santiago de Compostela, reuniu profesionais de todo o sector nun formato próximo e colaborativo.
A xornalista pontevedresa Tamara García Romero foi a encargada de presentar a gala, mentres que Señora DJ puxo o broche musical á velada. Estes premios nacen para recoñecer proxectos e traxectorias que destacan pola súa creatividade, compromiso, innovación e sustentabilidade dentro da industria musical galega.
Un xurado profesional integrado por Anxela Baltar, Cecilia Carballido, María Baqueiro, Noel Miguélez, Tito Lesende, Javier Becerra e a Fundación Paideia foi o encargado de escoller as persoas e iniciativas gañadoras nas 14 categorías xerais. A elas sumáronse dous premios escollidos pola Xunta Directiva de AGEM e un galardón elixido polo público.
GAÑADORAS E GAÑADORES DOS I PREMIOS DA INDUSTRIA MUSICAL DE GALICIA
Mellor deseño de iluminación: Teresa Tresandí, por DILUVIO (Tanxugueiras).
Mellor implementación de son: Iago Blanco, por La máquina del buen rollo (The Rapants).
Mellor empresa provedora de servizos: Vacaline.
Mellor profesional de produción: Xabi Carnota.
Mellor manager: Kin Martínez.
Mellor produción discográfica: Juan de Dios, por Feira (De Ninghures).
Mellor posta en escena: Marina Oural e Ugia Pedreira, por Síntese horizonte (Guadi Galego).
Mellor promotor/a-programador/a: Julio Gómez e Luis Campos, de Sinsalaudio.
Mellor proxecto de comunicación: Bring the Noise, polo Resurrection Fest Estrella Galicia.
Mellor identidade visual: Lara Caeiro, Sandra Montero, Noemí Solla, Kika V Ramil, Arantxa Brandón e Fillas de Cassandra, por Hibernarse (Fillas de Cassandra).
Mellor videoclip: Santi Iglesias, Sergio “Steel” e Fillas de Cassandra, por Hibernarse (Fillas de Cassandra).
Mellor evento cultural/musical: Surfing the Lérez.
Mellor espazo musical: Sala Capitol.
Mellor proxecto de sustentabilidade: Festival de la Luz.
Artista do ano (AGEM): Carlos Ares.
Persoa do ano (AGEM): Francisco Gómez ‘Gandy’.
Excelencia na experiencia do público (votación popular): Surfing the Lérez.
Os premios, unha ferramenta para fortalecer o sector
A presidenta de AGEM, Patricia Hermida, destacou que “a música galega vive un momento de madurez e diversidade extraordinarias” e que estes premios nacen para agradecer o talento e recoñecer o traballo que impulsa a industria musical como motor cultural, social e económico.
Os galardóns forman parte do Plan Estratéxico da Industria Musical de Galicia e buscan promover boas prácticas, visibilizar proxectos exemplares e fortalecer un sector profesional que ten un impacto económico superior aos 100 millóns de euros.