Os Mineiros de Touro-O Pino acusan a Ana Miranda de utilizar a comarca como «moeda de cambio político»
A Asociación de Mineiros de Touro-O Pino respondeu ás declaracións da eurodeputada do BNG Ana Miranda sobre o proxecto mineiro Cobre San Rafael, ao que defende como unha oportunidade para impulsar o emprego e a actividade económica na comarca e para abordar os pasivos ambientais que arrastra a antiga explotación. A entidade rexeita as afirmacións da representante política e acusa de trasladar ás institucións europeas cifras que considera inexactas e unha imaxe de rexeitamento social que, ao seu xuízo, non reflicte a realidade do territorio.
Nun comunicado difundido este mércores, 14 de outubro, a asociación sostén que a Comisión Europea dispoñía de información sobre o proxecto e as críticas que suscitaba antes de incluílo, en outubro de 2026, na súa relación de 46 proxectos estratéxicos ao abeiro do Regulamento de Materias Primas Críticas. Segundo lembra a entidade, a iniciativa foi seleccionada entre 102 solicitudes tras avaliar os seus estándares ambientais, sociais e de gobernanza.
A asociación considera «insostible» a afirmación de Ana Miranda de que a Comisión Europea non contaba con toda a información necesaria para tomar a decisión. Como argumento, sinala que organizacións ecoloxistas, plataformas contrarias á mina e formacións políticas como o BNG, Podemos e Esquerda Unida trasladan desde 2018 peticións e iniciativas de control ás institucións comunitarias.
Tamén lembra que, en 2019, a propia Ana Miranda viaxou a Bruxelas con representantes das plataformas para presentar tres denuncias ante a Comisión de Peticións. Ademais, indica que en 2023 o BNG volveu alertar ante as institucións europeas sobre a presenza de metais pesados na contorna da mina, uns datos que, segundo a asociación, foron rebatidos por informes elaborados por grupos de investigación das universidades públicas galegas.
Un dos principais puntos de desacordo céntrase no número de explotacións agrícolas e gandeiras que poderían verse afectadas pola reapertura da mina. A entidade reclama a Ana Miranda que explique a orixe da cifra de preto de 200 explotacións que, segundo a eurodeputada, resultarían prexudicadas polo proxecto.
Pola contra, a asociación asegura que, segundo a información recollida no Estudo de Impacto Ambiental, as explotacións agrícolas e gandeiras documentadas na contorna son aproximadamente dez. Por iso, considera irresponsable difundir unha cifra que multiplica por vinte esa cantidade sen achegar unha xustificación.
A entidade tamén cuestiona as referencias ás 1.500 alegacións contrarias ao proxecto durante a súa tramitación. Segundo afirma, presentáronse máis de 6.000 alegacións favorables, un dato que, ao seu entender, non se está a ter en conta no debate público.
Os mineiros sosteñen que os veciños e veciñas de Touro e O Pino están cansos de que se utilicen cifras que consideran parciais e de que se silencie a opinión de quen apoia a iniciativa.
Defende a reapertura como vía para solucionar os pasivos ambientais
A Asociación de Mineiros de Touro-O Pino tamén rebate a afirmación de que a mina foi rexeitada pola Xunta de Galicia. Neste sentido, lembra que o Tribunal Superior de Xustiza de Galicia anulou a declaración de impacto ambiental negativa, unha resolución que, segundo a entidade, deu a razón á empresa promotora.
O colectivo pon o foco nos pasivos ambientais que permanecen na zona desde o peche da explotación mineira nos anos oitenta, antes da entrada en vigor da actual lexislación ambiental. Segundo defende, estes problemas levan décadas sen unha solución, malia os sucesivos gobernos de distintas orientacións políticas.
A asociación considera que o proxecto Cobre San Rafael constitúe a única alternativa real e financeiramente viable para acometer a restauración ambiental da contorna. Na súa opinión, sen unha actividade mineira en funcionamento non se mobilizarán os recursos necesarios para resolver un problema que, asegura, leva corenta anos sen resolverse.
A entidade subliña que conta con máis de 1.800 socios, persoas que viven e traballan na comarca e que ven no proxecto unha oportunidade para crear emprego, dinamizar a economía e ofrecer perspectivas de futuro ao territorio.
A asociación recoñece que existe oposición á iniciativa e defende o dereito dos colectivos contrarios a expresar a súa postura. Porén, rexeita que unha única posición se presente como representativa de toda a comarca e asegura que hai miles de persoas en Touro e O Pino que apoian o proxecto.
«A comarca non é moeda de cambio político», sostén a entidade, que denuncia que o territorio se está a utilizar como escenario de confrontación política.
Finalmente, a asociación reclama a Ana Miranda e ao resto de representantes políticos que trasladen ás institucións europeas información contrastada e cifras verificables. Lembra que o proxecto continúa en tramitación ambiental e que corresponde á Xunta de Galicia avalialo conforme aos criterios técnicos e legais establecidos.
A entidade conclúe que a comarca merece información rigorosa e que a voz das persoas que apoian o proxecto debe recibir a mesma atención ca dos seus detractores.