Os Quinindiolas regresan para homenaxear a Narf na final do Premio que leva o seu nome
O Premio Narf celebrará a súa gala final o vindeiro sábado 24 de outubro no Salón Teatro de Santiago de Compostela, nunha edición marcada pola homenaxe a Fran Pérez, Narf, cando se cumpren dez anos do seu pasamento. A cita comezará ás 20.00 horas, con entrada libre, e contará coas actuacións de Raposa, Sofía Espiñeira e Abril, os tres proxectos finalistas do concurso, así como co regreso de Os Quinindiolas, banda da que formou parte o músico homenaxeado.
A gala busca reivindicar o legado artístico de Narf e a súa contribución á música galega. A deputada de Cultura, Natividad González, destacou o valor dunha figura que construíu unha linguaxe musical propia, mesturou estilos e explorou novas sonoridades, levando a música galega máis alá das súas fronteiras. Neste sentido, subliñou que manter vivo o premio que leva o seu nome permite seguir apostando pola creación, a diversidade musical e o talento do país.
González tamén puxo en valor o papel do certame dentro da política cultural, tanto polo seu significado para a música galega como pola figura á que rende homenaxe. O Premio Narf constitúe unha oportunidade para que novos proxectos musicais se dean a coñecer, compartan escenario e cheguen a novos públicos.
Un dos momentos máis destacados da gala será o regreso de Os Quinindiolas, que volven reunirse para lembrar o seu compañeiro dez anos despois do seu falecemento. A formación, activa entre 1988 e 1992 e considerada daquela unha proposta vangardista dentro do rock en galego, estará integrada nesta ocasión por Xelís de Toro, Marcos Teira, Pepe Sendón e Mon Orencio.
A homenaxe comezará coa interpretación do tema «Mercedes», de Narf, a cargo de Marcos Teira. Ademais, os efectos visuais creados polo artista Xavier Belho acompañarán a gala con referencias a diferentes etapas da vida artística de Fran Pérez.
As tres propostas finalistas disporán de quince minutos cada unha para actuar ante o público. O xurado, integrado polos músicos Mercedes Peón e Ramón Bermejo, os xornalistas Javier Becerra e Ana G. Liste e a programadora Noemí Vázquez, será o encargado de decidir a clasificación final. O proxecto gañador recibirá 4.000 euros, mentres que o segundo clasificado obterá 2.000 euros e o terceiro, 1.500 euros.
Durante a deliberación do xurado, o público poderá gozar da actuación de Os Quinindiolas. A gala estará presentada polo xornalista Luís Pardo, coa participación de Xavier Belho na realización dos efectos visuais.
Tres propostas musicais para a final
Raposa, Sofía Espiñeira e Abril foron seleccionadas entre os máis de trinta candidatos que se presentaron ao XVIII Concurso Fran Pérez «Narf» para grupos e artistas musicais.
Raposa é unha banda pontevedresa integrada por María Villanueva e Rubén Abad que combina influencias da música clásica, o jazz, as músicas do mundo, a canción protesta e o pop. A súa proposta destaca pola riqueza de matices e a delicadeza da interpretación. O xurado salientou os seus arranxos, a calidade musical e a voz delicada e expresiva.
Sofía Espiñeira, artista multidisciplinar de Mugardos que tamén desenvolve traballos como actriz, acróbata e bailarina, chega á final co seu segundo disco, Xeografías. O álbum aborda cuestións como as viaxes utópicas, as raíces, as fronteiras e os éxodos. O xurado destacou a súa personalidade como compositora, o seu discurso propio e o coidado dos arranxos.
Pola súa banda, Abril é un proxecto integrado por Claudia Abril, á voz e ás percusións, e Marina Carpente, ao violín e á voz. O dúo combina melodías tradicionais galegas e ibéricas con sonoridades actuais, nunha proposta de folk contemporáneo que incorpora instrumentos como a pandeireta, o pandeiro e o violín folk. O xurado valorou a súa capacidade para recoller o legado dunha tradición colectiva e transformalo en composicións contemporáneas, cunha voz de ornamentación coidada.
A gala do Premio Narf converterá así o Salón Teatro nun espazo de encontro entre novas propostas musicais e memoria cultural, cunha edición que quere manter viva a pegada de Fran Pérez e impulsar a creación musical galega.