Os senadores do PP reclaman visitar as obras da A-54 para supervisar o seu avance
Os senadores do Partido Popular por Lugo, José Manuel Barreiro, José Manuel Balseiro e Juan Serrano, solicitaron á Delegación do Goberno autorización para visitar as obras do tramo Melide Sur–Arzúa Oeste da autovía A-54 co obxectivo de coñecer sobre o terreo o ritmo de execución dos traballos e a situación actual da infraestrutura.
Os populares xustifican a petición polos sucesivos cambios nos prazos anunciados polo Executivo central para completar a conexión por autovía entre Lugo e Santiago. Segundo sinalan, as previsións foron variando desde finais de 2025 ata este verán, sen que na actualidade exista unha data concreta para a entrada en servizo do último tramo pendente.
Na súa solicitude propoñen que a visita se celebre ao longo deste mes de xullo e que conte coa coordinación da dirección facultativa da obra para poder recibir información técnica sobre o desenvolvemento dos traballos.
Os representantes lucenses do PP lembran que a supervisión das actuacións financiadas polo Estado forma parte das funcións de control que desempeñan como membros das Cortes Xerais e aseguran que continuarán reclamando información sobre a evolución desta infraestrutura.
Ademais, avanzan que manterán a presión parlamentaria no Senado para coñecer os motivos das modificacións realizadas no tramo entre Melide e Arzúa e para que o Goberno concrete un novo calendario de execución dunha autovía que consideran estratéxica para mellorar as comunicacións da provincia de Lugo.