Ourense suma cinco rutas e 14 saídas na nova edición dos Trens Turísticos de Galicia
A provincia de Ourense volve ter un papel destacado na nova campaña dos Trens Turísticos de Galicia, que arrinca unha nova edición con cinco rutas e un total de 14 saídas previstas no territorio ourensán. O programa, xa consolidado como unha das principais propostas de turismo ferroviario do Estado, mantén a súa aposta pola colaboración institucional e pola posta en valor dos recursos galegos.
A campaña 2026 foi presentada na estación de tren de Ourense nun acto no que participaron representantes do Inorde, da Renfe e de Turismo de Galicia, entidades que impulsan este programa xunto coa Deputación de Ourense.
Segundo se explicou na presentación, esta edición conta con 13 rutas e 33 saídas programadas entre marzo e outubro, das cales a provincia de Ourense concentra cinco itinerarios, converténdose nun dos territorios con maior presenza dentro da oferta global.
O presidente do Inorde, Rosendo Fernández, destacou o valor desta iniciativa e definiuna como “no produto turístico máis exitoso e demandado de toda a provincia”, ao tempo que puxo o acento na cooperación entre administracións como clave do seu funcionamento. Nesa mesma liña, sinalou que se trata de “un dos mellores exemplos da colaboración institucional para crear produtos turísticos de calidade, sostibles e capaces de xerar actividade económica no territorio durante boa parte do ano”.
Dentro da oferta ourensá, catro das cinco rutas están xestionadas polo propio Inorde, incluíndo os percorridos de Ribeira Sacra-Valdeorras, Monterrei, Ribeiro e Ribeira Sacra. A ruta de Monterrei, ademais, incorpora unha saída adicional respecto á edición anterior.
As propostas permitirán achegarse a algúns dos principais recursos patrimoniais, culturais e enogastronómicos da provincia, combinando visitas a espazos singulares co coñecemento das denominacións de orixe vitivinícolas de Ourense. Entre os lugares incluídos destacan enclaves como o Mosteiro de San Pedro de Rocas, o Santuario das Ermidas, o Castro de San Cibrao de Las ou o Castelo de Monterrei.
O programa complétase con iniciativas complementarias promovidas polo Inorde, como os Museos das Estacións de Tren, o Aula-Museo do Ferrocarril dos Peares ou o Museo do Traxe Tradicional Galego de Santa Cruz de Arrabaldo, xunto con experiencias como visitas teatralizadas e percorridos en catamarán.
Desde a Deputación de Ourense salientan que esta iniciativa contribúe a reforzar a proxección turística da provincia, favorecendo a desestacionalización e consolidando Ourense como destino vinculado ao patrimonio, á natureza e ao enoturismo, nun programa que continúa a rexistrar unha alta demanda ano tras ano.