Pechan todos os polígonos bateeiros de Galicia pola expansión da marea vermella
O Instituto Tecnolóxico para o Control do Medio Mariño (Intecmar) decretou o peche da totalidade dos polígonos de bateas de mexillón en Galicia ante a expansión da marea vermella nas rías galegas.
A pasada semana xa foran clausuradas case todas as zonas de produción pola detección de biotoxinas mariñas, aínda que permanecían abertos dous polígonos situados nas rías de Ares e Betanzos, concretamente Sada 1 e Sada 2. Nas últimas horas, Intecmar decidiu tamén suspender a actividade nestas áreas.
Dende mediados de abril foise rexistrando un aumento progresivo da presenza da microalga tóxica ‘Dinophysis acuminata’, responsable da produción de toxinas que afectan aos cultivos de moluscos bivalvos.
A Xunta de Galicia puxo en valor o labor desenvolvido por Intecmar no control e peche das zonas afectadas, co obxectivo de garantir a seguridade alimentaria e protexer aos consumidores.
As toxinas detectadas son de tipo lipofílico ou diarreico, asociadas a trastornos gastrointestinais. Ademais dos polígonos de mexillón, a situación afecta tamén a boa parte das áreas dedicadas á extracción de moluscos infaunais, con máis dunha vintena de zonas actualmente sen actividade das preto de corenta existentes en Galicia.