Picusa Academy culmina un histórico dobrete na Copa de España Júnior coa vitoria de Hugo Muñoz
Picusa Academy asinou este mércores unha xornada histórica para o ciclismo galego ao conquistar a clasificación individual da Copa de España Júnior, un título que ningún equipo de Galicia conseguira ata o momento. Hugo Muñoz defendeu o liderado cunha vitoria en solitario na localidade valenciana de Moixent, onde o conxunto de Mos tamén se impuxo na clasificación por equipos da última proba puntuable da tempada.
O equipo mosense xa asegurara matematicamente o pasado domingo, en Peñafiel, a vitoria na clasificación xeral por equipos da Copa de España, un éxito que volvía conseguir despois de logralo tamén en 2024. Co título garantido, o principal obxectivo na última carreira era conservar o liderado da clasificación individual.
Hugo Muñoz asumira esa posición de privilexio tras finalizar segundo na proba disputada na provincia de Valladolid e chegaba a Moixent cunha vantaxe de 45 puntos sobre o segundo clasificado.
Porén, o desenvolvemento dos 126 quilómetros do V Trofeo Júnior Moixent complicou inicialmente as súas opcións. Arredor do quilómetro 45, o pelotón dividíuse en dous grupos e o líder da xeral quedou atrapado no segundo.
Muñoz iniciou entón unha persecución en solitario e conseguiu alcanzar o grupo dianteiro. Posteriormente, a dureza do percorrido foi seleccionando a carreira e o paso por Cumbres de Valencia, coroado no quilómetro 78,3, terminou de definir a loita entre os corredores máis fortes.
Sergio Martín, do Electromercantil, foi o primeiro en superar a cima, seguido por Hugo Muñoz. Ambos afrontaron xuntos os últimos quilómetros tras consolidar unha vantaxe suficiente sobre os seus perseguidores para disputarse entre eles o triunfo.
O corredor do Picusa Academy conseguiu finalmente descolgar a Martín no tramo decisivo e abriu unha diferenza que lle permitiu chegar en solitario á liña de meta. A vitoria puxo o peche a unha tempada marcada pola súa regularidade nas nove probas que formaron parte da Copa de España Júnior 2026.
A xornada completouse co triunfo de Picusa Academy na clasificación por equipos da proba de Moixent. O cuarto posto do coruñés Lucas Blanco e a décimo oitava posición do pontevedrés Marco Núñez contribuíron a ese resultado.
Este dobre éxito na Copa de España súmase ademais ao logrado polo conxunto de Mos o pasado domingo en Portugal, onde se proclamou vencedor final da clasificación por equipos da Taça de Portugal. Os resultados acadados durante esta tempada consolidan o proxecto galego como unha das referencias da categoría júnior na península ibérica.