Pontón sitúa as municipais como primeiro gran reto do BNG e augura que será "a forza que máis medre"
O BNG pon xa o foco nas próximas eleccións municipais do 23 de maio coa intención de ampliar a súa representación e sumar novas alcaldías. A portavoz nacional, Ana Pontón, asegurou que a formación afronta a cita electoral convencida de que será "a forza política que máis medre" e avanzou que xa están elixidas as persoas que encabezarán as candidaturas nacionalistas en 94 concellos, entre eles as sete cidades galegas.
Pontón marcou as prioridades do novo curso político durante a primeira reunión do Consello Nacional do BNG, na que defendeu que a organización continúa avanzando "con paso firme" dentro dunha folla de ruta que definiu como "clara e ambiciosa".
"Imos traballar con máis ilusión que nunca para conseguir máis concelleiros e concelleiras, máis alcaldías do BNG", afirmou. Segundo explicou, aumentar a presenza municipal permitirá incrementar a capacidade da formación para actuar desde os concellos e, ao mesmo tempo, fortalecer a súa alternativa política para Galicia.
De cara aos próximos meses, o Bloque desenvolverá unha intensa axenda municipal que incluirá tres grandes encontros. Un deles estará dedicado especificamente ás grandes cidades, outro reunirá representantes de gobernos e cogobernos municipais e o terceiro será un encontro nacional multitudinario co que a formación pretende dar o pistoletazo de saída á carreira cara ao 23M.
Pontón chamou tamén a intensificar o contacto directo coa cidadanía para ampliar a base social e electoral do nacionalismo e chegar "a todas as persoas que levan Galiza na cabeza e no corazón". Neste camiño, presentou como principal aval a xestión dos gobernos locais do BNG.
A portavoz nacional destacou actuacións relacionadas coa defensa da sanidade e da educación públicas, o apoio ás pemes e ao tecido económico local, a protección do territorio, a recuperación dos espazos públicos, a igualdade ou a cultura. Tamén reivindicou a defensa do galego, unha lingua que, advertiu, "non imos permitir que nos rouben".
Críticas a Rueda
Boa parte da intervención de Pontón estivo dirixida contra o presidente do Goberno autonómico, Alfonso Rueda, ao que acusou de antepoñer os intereses do Partido Popular aos de Galicia.
"Cada vez que ten oportunidade de elixir entre o Partido Popular e Galiza, sempre escolle o PP", reprochou. A dirixente nacionalista criticou especialmente que Rueda non presidise o pasado luns o Consello da Xunta para desprazarse a Madrid, onde, segundo Pontón, foi exercer "de palmeiro de Feijóo e do seu discurso de odio".
"Os galegos e as galegas non lle pagan para ser o palmeiro de Feijóo, senón para mellorar a vida da xente deste País", afirmou.
A líder do Bloque sostivo ademais que "Rueda nin está, nin se lle espera" cando se trata de dar respostas á clase traballadora, pensionistas e mocidade. Vinculou esta crítica cos recortes e privatizacións que atribúe ao Executivo autonómico en ámbitos como a sanidade, a educación e os coidados, así como coa evolución dos prezos e os problemas de acceso á vivenda.
Pontón acusou tamén o presidente galego de utilizar o Goberno autonómico "ao servizo da campaña electoral de Feijóo" e censurou a posición do PP ante cuestións como a transferencia da AP-9 ou a quita de 4.000 millóns de euros da débeda pública. Neste contexto, chegou a cualificar a Rueda como "o presidente do 'Non' a Galiza" e "o presidente máis desleal con este país da historia".
Fronte ao PP, Pontón reivindicou os resultados conseguidos polo BNG coa súa representación no Congreso e no Senado e asegurou que a formación continuará negociando durante o que resta de lexislatura estatal medidas beneficiosas para Galicia.
"Fan ben en estar nerviosos porque imos a por todas, nas municipais, nas xerais e nas galegas", advertiu. Para Pontón, o escenario político galego está cada vez máis marcado pola confrontación entre "a Galiza do medo que representa o PP" e "a Galiza da esperanza que representa o BNG".
A dirixente nacionalista pechou a súa análise electoral situando tres grandes retos para a formación: ampliar a representación en Madrid, incrementar a forza municipal e alcanzar o Goberno galego. "Nós non estamos aquí para conformarnos, estamos aquí para construír unha nova maioría social", concluíu.
Migración e crise de Ceuta
Pontón dedicou tamén parte da súa intervención á política migratoria e reafirmou o compromiso do BNG coa paz, a liberdade, os dereitos e a dignidade humana. Tras referirse á morte de 141 persoas afogadas en Ceuta, cualificou a resposta á crise como un "síntoma da deshumanización destes tempos".
Neste ámbito, acusou o PP de aproveitar a situación "para facer electoralismo" e "azuzar o odio contra as persoas migrantes". Tamén criticou a negativa a acoller menores en Galicia e cuestionou a posición do presidente autonómico: "Que solidariedade ten Rueda con Ceuta cando se nega a acoller a eses menores e ser parte da solución?".