Premio para a campaña turística da Deputación de Pontevedra no International Tourism Film Festival Africa
A Deputación de Pontevedra suma un novo galardón para a campaña A túa meta, o teu destino, tras acadar o premio de prata na categoría de destino turístico no International Tourism Film Festival Africa celebrado na cidade de Johannesburgo. O vídeo da campaña de promoción da provincia de Pontevedra competiu con 438 candidaturas de 47 países diferentes.
O galardón no International Tourism Film Festival Africa trátase do terceiro premio conseguido polo audiovisual A túa meta, o teu destino neste 2026. O primeiro foi no Japan World´s Tourism Film Festival, onde competiu con 1.300 candidaturas de 110 países, e o segundo no New York Festival TV & Film Awards, onde foi seleccionado por un xurado integrado por máis de 200 produtores, directores e profesionais creativos dos medios de comunicación de todo o mundo.
A Deputación de Pontevedra reafirma coa campaña A túa meta, o teu destino o seu compromiso coa promoción dun modelo turístico innovador, sostible e de calidade, no que o deporte actúa como motor de desenvolvemento económico, social e territorial. A campaña busca consolidar as Rías Baixas como un destino de referencia para o turismo activo, poñendo en valor os recursos naturais da provincia, apoiando o tecido deportivo e turístico local e impulsando un estilo de vida saudable que conecta territorio, persoas e experiencias.