Rexístrase en Pontevedra un incremento do número de viaxeiros estranxeiros en setembro
A Deputación remarca o incremento do 8,5% no número de viaxeiros estranxeiros rexistrados en setembro, sendo xa case a metade das persoas que visitan a provincia. Neste eido, este mes de outubro a oficina de turismo do Palacete das Mendoza, sede de Turismo Rías Baixas, recibiu xa máis persoas estranxeiras que turistas nacionais, representando o 51,3% e procedente, maioritariamente, de países como Estados Unidos, Francia e Alemaña.
Segundo o INE, a provincia de Pontevedra recibiu no mes de setembro o 34% das persoas que visitaron Galicia. Delas, o 47,3% eran persoas procedentes do estranxeiro, o que supón un incremento do 8,5% con respecto ao mesmo mes do pasado ano. Neste eido, o turismo internacional continúa a manter a tendencia crecente que está rexistrando ao longo do 2026 e trala aposta do goberno da Deputación de Pontevedra por expandir a promoción do destino fóra do territorio español.
En liñas xerais, o número de visitantes de setembro medrou un 5% con respecto ao mesmo mes do ano pasado e o destino Rías Baixas consolídase como un dos lugares máis elixidos de Galicia para visitar, acadando, ademais, unha ocupación do 54% de media, cun incremento de máis de cinco puntos porcentuais con respecto a setembro do 2026. Ademais, en canto á ocupación, a porcentaxe máis elevada situouse en Pontevedra, co 76,6%, seguida de Vigo, co 65%, O Grove, co 54%, e Sanxenxo, co 51,5%.
No que respecta ao mes de outubro e ata a data, a oficina de turismo do Palacete das Mendoza recibiu máis de 2.230, das cales o 51,3% procede do estranxeiro e principalmente de Estados Unidos, Francia e Alemaña. No que respecta ao turista español, chega maioritariamente desde Madrid, Barcelona e Valencia. Alóxanse maioritariamente en hoteis, 3 días, e visitan a provincia motivados pola oferta de ocio e o Camiño de Santiago. Neste eido, neste mes de outubro percorreron xa algunhas das rutas cara Compostela que atravesan a provincia preto de 28.000 persoas peregrinas, sendo o Camiño Portugués o máis transitado (13.450 persoas), seguido do Camiño Portugués pola Costa (13.169), a Vía da Prata (991) e o Camiño do Inverno (300 persoas). Trátanse principalmente de persoas estranxeiras (81%) que proceden, na súa maioría, de Estados Unidos, Portugal e Alemaña.