Rueda anuncia que Galicia regulará os exames virtuais na educación pública non universitaria
O presidente da Xunta, Alfonso Rueda, anunciou no Pleno do Parlamento que Galicia será a primeira comunidade en regular os exames virtuais na ensinanza pública non universitaria.
Segundo explicou durante a sesión de control, esta medida formará parte da futura Lei de educación dixital e permitirá o uso de sistemas biométricos para garantir a autenticidade dos resultados nas probas realizadas a distancia sen supervisión directa do profesorado.
A normativa incluirá tamén outras cuestións relacionadas coa adaptación do sistema educativo aos novos retos tecnolóxicos, como a regulación do uso da intelixencia artificial nas aulas, a limitación do uso do móbil —permitido só con fins pedagóxicos a partir de terceiro da ESO— ou a prohibición de gravar clases sen autorización.
Ademais, establecerase que a comunicación entre profesorado e familias se realice exclusivamente a través da plataforma Abalar.
Durante a súa intervención, Rueda destacou que o Goberno galego traballa para manter bos datos económicos na comunidade, apostando pola formación, a atracción de investimentos e o aproveitamento do potencial industrial de Galicia.
Tamén puxo en valor iniciativas como o impulso das microformacións, a adaptación da formación profesional ás necesidades do mercado laboral e o reforzo das políticas de conciliación.