Rueda completa a remodelación do Goberno galego con tres novos nomeamentos
O presidente da Xunta, Alfonso Rueda, pechou a remodelación do seu Goberno, iniciada tras a saída de Fabiola García da Consellería de Política Social para incorporarse ás listas electorais do 29N, cunha serie de tres novos nomeamentos que afectan a distintas áreas da Administración autonómica.
Un dos cambios máis destacados é o nomeamento de Margarita Segade como nova directora xeral de Calidade Ambiental e Sostibilidade, en substitución de María José Echevarría. Segade, enxeñeira técnica agrícola e funcionaria, estaba desde 2024 á fronte do Servizo de Avaliación Ambiental de Plans e Programas.
Pola súa banda, María José Echevarría pasa a ocupar a xerencia do Consorcio Galego de Servizos da Igualdade e Benestar, despois de completar o correspondente procedemento administrativo. Este movemento supón o seu traslado a outro departamento da Xunta.
A remodelación tamén afecta á área de Pesca. Ángeles Vázquez Suárez, que ata agora ocupaba a Dirección Xeral de Desenvolvemento Pesqueiro, foi nomeada nova directora xeral de Pesca, Acuicultura e Innovación Tecnolóxica. O seu nomeamento prodúcese tras a saída de Isaac Rosón, que pasou a desempeñar o cargo de secretario xeral de Industria.
A vacante deixada por Vázquez Suárez na Dirección Xeral de Desenvolvemento Pesqueiro será ocupada por José David Gómez Brandariz, licenciado en Bioloxía e que ata o momento exercía como subdirector xeral de Xestión, Ensino e Relacións Sectoriais dentro do mesmo departamento. Ao longo da súa traxectoria tamén desempeñou diferentes postos de responsabilidade na Consellería.