Sae a licitación por máis de 130.000 euros a renovación do sistema de climatización do centro de saúde de Monforte de Lemos
Publicouse no Portal de Contratos Públicos de Galicia un novo concurso destinado a renovar por completo o sistema de produción de climatización do centro de saúde de Monforte de Lemos. O orzamento fixado para esta actuación ascende a 138.216 euros, e contempla a substitución das tres unidades exteriores actuais por equipos de nova xeración, de alta frecuencia e maior rendemento enerxético.
O proxecto non se limita ao cambio de maquinaria, senón que inclúe tamén unha posta ao día tecnolóxica e enerxética de toda a instalación. Entre as súas finalidades figuran aumentar a eficiencia do sistema, rebaixar os gastos derivados do seu funcionamento, mellorar a súa fiabilidade e facilitar tarefas de mantemento preventivo. Así mesmo, búscase dixitalizar a instalación para deixala preparada de cara a unha futura integración en plataformas de edificación intelixente (Smart Building) e en solucións de xemelgo dixital.
Segundo se explica, optar por unha substitución completa dos equipos resulta a opción máis eficaz e rendible se se analiza o custo ao longo de todo o seu ciclo de vida, en comparación con outras alternativas de reforma parcial.
Entre os efectos esperados da intervención atópanse, ademais dun mellor funcionamento xeral do sistema de climatización, garantir que o servizo non se vexa interrompido, diminuír o gasto enerxético, reducir as emisións de CO₂ asociadas e dispor de datos enerxéticos en tempo real para un mellor control da instalación. As estimacións apuntan a que se podería acadar un aforro de entre o 20 % e o 30 % nos custos de mantemento, así como unha redución do consumo enerxético de entre o 30 % e o 40 %.
As empresas que estean interesadas en optar a este contrato dispoñen de prazo ata o vindeiro 2 de outubro para presentaren as súas propostas.