Santiago entra este xoves na declaración de zona de mercado residencial tensionado
O Boletín Oficial do Estado (BOE) publicou este mércores a declaración de Santiago de Compostela como zona de mercado residencial tensionado, unha medida que entrará en vigor este xoves e permanecerá vixente durante un período inicial de tres anos. A decisión permitirá aplicar na cidade os mecanismos de limitación dos prezos do alugueiro recollidos na Lei estatal de Vivenda, ademais das actuacións previstas no plan elaborado polo Concello para corrixir a situación do mercado residencial.
Con esta declaración, Santiago convértese na segunda cidade galega en formar parte desta clasificación, despois da Coruña, que obtivo esta consideración hai un ano. A capital galega incorpórase, xunto con outras seis localidades do Estado, ao total de 317 municipios declarados oficialmente como zonas de mercado residencial tensionado.
O delegado do Goberno en Galicia, Pedro Blanco, asegurou que esta ferramenta está a ofrecer resultados positivos noutros territorios, onde, segundo indicou, os prezos do alugueiro experimentaron un descenso significativo. Ademais, destacou que a medida favorecerá unha maior oferta de contratos estables e permitirá activar novas bonificacións e incentivos destinados tanto a propietarios como a inquilinos.
A partir deste xoves, todos os novos contratos de alugueiro que se formalicen en Santiago deberán tomar como referencia o importe do contrato anterior e o índice estatal de prezos do alugueiro que resulte de aplicación. En paralelo, o Concello desenvolverá durante os próximos tres anos un conxunto de medidas correctoras, elaboradas conforme á normativa vixente, co obxectivo de contribuír á estabilización do mercado da vivenda na cidade.