Santiago impulsa unha campaña para promover masculinidades igualitarias e corresponsables antes do 25N
A alcaldesa de Santiago, Goretti Sanmartín, presentou este luns unha nova campaña da área municipal de Igualdade destinada a promover modelos de masculinidade igualitarios e corresponsables como antesala do 25 de novembro, Día Internacional da Eliminación da Violencia contra as Mulleres. Na presentación tamén participou a directora do Centro de Información ás Mulleres (CIM), Rita Barreiro.
Co lema ‘Faite un home’ e o sublema ‘un home dos que desexan cambiar’, a iniciativa propón unha revisión do significado tradicional de facerse un home desde unha perspectiva feminista. O obxectivo é cuestionar os estereotipos machistas, fomentar a reflexión e abrir espazos de diálogo arredor das novas masculinidades.
Sanmartín definiu a proposta como unha «campaña rompedora» que aposta por novos modelos masculinos como vía para avanzar cara á igualdade real. Neste sentido, destacou a importancia de implicar os homes no proceso de transformación social e animounos a descubrir os aspectos positivos de construír unha masculinidade feminista.
Entre os propósitos da campaña figuran tamén dar un novo significado ao concepto de masculinidade, recoñecer a vulnerabilidade masculina, visibilizar a diversidade das identidades LGTBIQ+, fomentar a corresponsabilidade e a ética dos coidados e combater a complicidade masculina ante as violencias machistas.
A rexedora explicou que a iniciativa comezou a principios de novembro para promover un debate previo e chegar ao 25N cun maior nivel de reflexión e sensibilización. A proposta aposta por transmitir unha mensaxe positiva sobre o cambio, presentando as novas masculinidades como un modelo de home íntegro afastado das concepcións tradicionais hexemónicas.
Referentes de Santiago participarán como embaixadores da campaña
A directora do CIM, Rita Barreiro, explicou que as redes sociais serán a principal vía de difusión da iniciativa, que tamén terá presenza na rúa mediante mupis, traseiras de autobuses e carteis publicitarios.
Ademais, nos próximos días publicaranse vídeos con persoas referentes de Santiago que prestarán a súa imaxe para apoiar a campaña. Esta rede de embaixadores estará integrada por figuras con recoñecemento público en ámbitos como o deporte, a cultura tradicional, as artes plásticas, o xornalismo, a divulgación histórica e a música.
A alcaldesa subliñou que a campaña vai máis alá dunha invitación aos homes para reflexionar sobre as súas emocións, o autocoñecemento ou as relacións persoais. A iniciativa pretende tamén cuestionar as estruturas sociais que reproducen as desigualdades entre mulleres e homes, partindo dunha das ideas fundamentais do feminismo: o persoal é político.
Neste sentido, Sanmartín advertiu de que revisar os modelos de masculinidade implica combater os comportamentos e as dinámicas que perpetúan a violencia contra as mulleres, como a asociación da figura masculina co dominio, o control e a forza, os silencios e as complicidades entre homes ou a distribución desigual do poder.
A rexedora incidiu en que a violencia machista representa a expresión máis grave deste sistema de desigualdade e que, polo tanto, non abonda con actuar sobre as súas consecuencias. Considera necesario interpelar directamente os homes e conseguir que participen activamente na súa erradicación.
Sanmartín lembrou que os comportamentos e as responsabilidades dentro do fogar tamén teñen unha dimensión política, xa que é no ámbito cotián onde se reproducen moitas das desigualdades. Así, sinalou que a masculinidade hexemónica non só limita a quen a representa, senón que tamén constitúe unha posición de poder sustentada no tempo, no traballo non recoñecido e na seguridade das mulleres.
Un cartel que cuestiona o modelo tradicional de masculinidade
A imaxe gráfica da campaña parte dun busto de inspiración grecolatina, representación do canon tradicional da masculinidade occidental, que aparece intervido, retirado do seu pedestal e trasladado ao espazo público cunha estética modificada e acompañada do lema ‘Faite un home’.
O sublema ‘un home dos que desexan cambiar’ toma como referencia a obra de Bell Hooks ‘O desexo de cambiar. Homes, masculinidade e amor’, da autora considerada unha das voces máis destacadas do feminismo negro e antirracista e da educación igualitaria.
A partir desta inspiración, a campaña estrutúrase en catro liñas temáticas: o autocoidado e as emocións, os coidados e a corresponsabilidade, as relacións afectivas e a procura da igualdade. Estes contidos iranse desenvolvendo a través de diferentes mensaxes, como ‘un home dos que non agochan os sentimentos’, ‘un home dos que escoita máis do que explica’ ou ‘un home dos que marcha porque ten a pota ao lume’.
A programación municipal completarase con diferentes iniciativas na Casa das Mulleres Xohana Torres ao longo deste mes. Entre elas figura a distribución de dípticos informativos para explicar que é a corresponsabilidade e ofrecer pautas para incorporala á vida cotiá.
Ademais, o mércores 18 de novembro, entre as 18.00 e as 20.00 horas, terá lugar un obradoiro sobre autocoidado, corresponsabilidade e benestar emocional dirixido a mulleres coidadoras.
A actividade pretende crear un espazo de encontro e reflexión sobre o traballo dos coidados, especialmente aquel que permanece invisible e conta con pouco recoñecemento social. A través de dinámicas prácticas e do intercambio de experiencias, as participantes poderán identificar a carga física, emocional e mental que implica esta tarefa, nun ambiente de confianza e apoio mutuo desde unha perspectiva feminista e comunitaria.