SATSE reclama a creación dunha Dirección Xeral de Coidados liderada por profesionais de Enfermaría
O Sindicato de Enfermaría SATSE Galicia presentou alegacións ao anteproxecto de modificación das áreas sanitarias do Sergas nas que reclama un reforzo da dirección de Enfermaría e a creación dunha Dirección Xeral de Coidados que sitúe esta área nun nivel estratéxico dentro do sistema sanitario galego.
A organización sindical considera que os importantes retos demográficos, sanitarios e sociais aos que se enfronta Galicia fan necesario avanzar cara a un modelo organizativo que outorgue un maior protagonismo aos coidados, en resposta ás necesidades actuais da poboación.
Segundo expón SATSE, o progresivo envellecemento da sociedade, o aumento da cronicidade, a pluripatoloxía, a dependencia e a crecente complexidade asistencial esixen a posta en marcha de estruturas directivas específicas capaces de garantir unha adecuada planificación, xestión e avaliación dos coidados en todos os ámbitos asistenciais.
Por este motivo, o sindicato considera prioritaria a creación dunha Dirección Xeral de Coidados liderada por profesionais de Enfermaría, co obxectivo de que os coidados formen parte do nivel estratéxico de toma de decisións dentro do sistema sanitario galego.
Desde SATSE defenden que esta proposta supón un cambio de paradigma orientado cara a un modelo centrado nos coidados, na prevención, no seguimento dos pacientes, na continuidade asistencial e na mellora da coordinación entre os diferentes niveis de atención. Ao seu xuízo, esta fórmula permitiría tamén unha utilización máis eficiente dos recursos humanos e materiais dispoñibles.
A organización sostén ademais que a incorporación de xestores de Enfermaría nos máximos órganos de dirección constitúe unha medida eficaz a medio e longo prazo, xa que estes profesionais contan cun coñecemento directo da realidade asistencial desenvolvida en hospitais, centros de saúde, dispositivos comunitarios e servizos de atención domiciliaria.
SATSE Galicia entende que o reforzo das estruturas de dirección dos coidados resulta fundamental para afrontar os desafíos actuais do sistema público de saúde e garantir unha atención adaptada ás novas necesidades da cidadanía.