Sumar Galicia presentará unha ILP con máis colectivos sociais que declare toda Galicia zona tensionada
Movemento Sumar Galicia participou este sábado nas marchas pola vivenda convocadas en diferentes cidades do país para reclamar medidas urxentes fronte á escalada dos prezos do alugueiro e ás difi cultades de acceso a unha vivenda digna que sofren milleiros de galegas e galegos. O secretario xeral da organización, Paulo Carlos López, participou na mobilización de Santiago de Compostela, onde atendeu aos medios de comunicación, onde reivindicou que a crise da vivenda constitúe na actualidade un dos principais factores de desigualdade social. A organización considera que a vivenda converteuse na "auténtica aspiradora de cartos da clase traballadora", absorbendo unha parte crecente dos ingresos das familias e difi cultando especialmente a emancipación da mocidade e o desenvolvemento de proxectos vitais.
Movemento Sumar Galicia sinalou que a principal responsabilidade da situación que vive Galicia corresponde á Xunta e ao Partido Popular, aos que acusa de chegar tarde a todas as medidas necesarias para facer fronte á emerxencia habitacional. A organización lembra que o Goberno galego demorou a aplicación da Lei estatal de Vivenda, non impulsou a mobilización da vivenda baleira e continúa negándose a empregar as ferramentas dispoñibles para conter os prezos do alugueiro.
Neste sentido, tamén criticou o voto contrario do Partido Popular á recente conxelación dos alugueiros durante dous anos, unha medida que podería benefi ciar a arredor de 150.000 persoas en Galicia. Para Movemento Sumar Galicia, esta decisión evidencia que o PP continúa situándose do lado dos intereses especulativos fronte ás necesidades da maioría social.
Ao mesmo tempo, a formación puxo en valor as medidas impulsadas por Sumar desde o Goberno do Estado. A pesar de non dispoñer de competencias directas en materia de vivenda, destacou actuacións promovidas polo ministro Pablo Bustinduy para limitar os abusos das vivendas de uso turístico e perseguir prácticas irregulares das grandes inmobiliarias mediante procedementos sancionadores.
Durante a mobilización, Paulo Carlos López anunciou ademais que Movemento Sumar Galicia ten xa preparada a súa Iniciativa Lexislativa Popular pola vivenda, que será presentada ao longo deste mes tras un proceso de diálogo con organizacións sociais, sindicais e políticas para incorporar as súas propostas e demandas.
A iniciativa incluirá, entre outras medidas, a declaración de toda Galicia como zona tensionada, a limitación dos prezos do alugueiro, a mobilización da vivenda baleira cara ao mercado residencial e a regulación dos prezos das residencias privadas para estudantes.
Movemento Sumar Galicia avanzou que nas próximas semanas dará a coñecer os colectivos sociais, sindicais e políticos que se incorporan a esta iniciativa, coa vontade de construír unha ampla alianza galega en defensa do dereito á vivenda e de impulsar solucións efi caces fronte a unha das principais preocupacións da cidadanía.