Tráfico reforzará os controis de velocidade nas estradas de Pontevedra durante a primeira semana de agosto
A Dirección Xeral de Tráfico (DXT) reforzará entre os días 3 e 9 de agosto os controis de velocidade nas estradas da provincia de Pontevedra dentro dunha campaña especial de vixilancia que se levará a cabo en toda España. Así o anunciou o subdelegado do Goberno en Pontevedra, Abel Losada, quen explicou que a Agrupación de Tráfico da Garda Civil incrementará a súa presenza para previr condutas de risco e reducir os accidentes de circulación.
A campaña desenvolverase nunha das semanas con maior intensidade de tráfico do verán, polo que os controis se concentrarán especialmente nas estradas convencionais e nos treitos con maior índice de accidentalidade, aínda que tamén se realizarán inspeccións nas vías urbanas.
Abel Losada lembrou que a velocidade inadecuada segue a ser unha das principais causas dos accidentes de tráfico. Segundo os datos da DXT, este factor estivo presente no 22 % dos sinistros mortais rexistrados en España durante 2024, converténdose no terceiro elemento concorrente máis frecuente nos accidentes con vítimas mortais.
Ademais, as estimacións da Dirección Xeral de Tráfico indican que entre o 10 % e o 15 % dos accidentes de circulación, e arredor do 30 % dos mortais, están relacionados co exceso de velocidade ou cunha velocidade inadecuada ás condicións da vía.
O subdelegado do Goberno apelou á responsabilidade dos condutores e lembrou que respectar os límites establecidos é unha das medidas máis eficaces para mellorar a seguridade viaria. Neste sentido, incidiu en que uns minutos de aforro nun desprazamento non compensan o risco que supón poñer en perigo a vida propia e a do resto de usuarios da estrada.
Na última campaña estatal de control da velocidade, celebrada en abril deste ano, foron controlados preto de 1,9 millóns de vehículos e denunciados máis de 98.700 condutores por superar os límites permitidos.
A DXT lembrou tamén que desde o ano 2022 xa non está permitido exceder en 20 quilómetros por hora o límite de velocidade para realizar adiantamentos en estradas convencionais, unha medida adoptada para incrementar a seguridade e reducir a gravidade dos accidentes.