Medio ambiente

Desde a formación lembran que existen ferramentas legais suficientes para intervir, ben a través de ordenanzas municipais ou mediante a adaptación das instalacións deportivas

O coordinador de UCIN Galicia, José Luis Calo, esixiu este domingo unha resposta “inmediata e efectiva” por parte dos concellos galegos ante o impacto ambiental que están a provocar as pistas de pádel con peches de cristal, ás que responsabiliza da morte de aves, incluídas algunhas especies protexidas.

Calo advertiu de que se trata dun problema “real, crecente e evitable”, polo que instou ás administracións locais a actuar dentro das súas competencias para garantir a protección da biodiversidade. Segundo sinalou, “os alcaldes non poden permanecer impasibles ante unha situación que xa está documentada”, polo que reclamou acción municipal e o cumprimento estrito da normativa vixente.

Desde a formación lembran que existen ferramentas legais suficientes para intervir, ben a través de ordenanzas municipais ou mediante a adaptación das instalacións deportivas. Neste contexto, UCIN Galicia advertiu de que a falta de actuación podería derivar en responsabilidades legais para os concellos. Ademais, subliñan que a Fiscalía Xeral do Estado reforzou nos últimos anos o seu criterio para actuar ante a morte de aves por colisións contra superficies acristaladas, chegando a contemplar en determinados casos a vía penal como delito contra a fauna.

A organización propón a adopción inmediata de solucións técnicas de baixo custo que xa demostraron a súa eficacia, como a colocación de vinilos visibles nos cristais, a instalación de patróns anticolisión ou o uso de redes protectoras. “Son medidas sinxelas e económicas que poden salvar numerosas vidas, polo que non hai escusas para non aplicalas”, destacou Calo.

UCIN Galicia fai así un chamamento directo aos concellos para que revisen as instalacións existentes e actúen con rapidez, priorizando a adaptación das pistas situadas en zonas especialmente sensibles para as aves. O coordinador concluíu lembrando que “a protección do medio ambiente non é unha opción, senón unha obriga legal e moral á que as administracións deben responder”.