UGT impulsa o primeiro protocolo contra a violencia laboral no Servizo de Axuda no Fogar en Galicia
UGT Servizos Públicos Galicia valorou moi positivamente a sinatura do Protocolo para a prevención e actuación ante situacións de violencia laboral externa no Servizo de Axuda no Fogar (SAF), un documento pioneiro na comunidade que establece un marco común de prevención, actuación e seguimento fronte ás situacións de violencia que poden sufrir as profesionais do sector durante o desempeño do seu traballo.
O protocolo é o resultado de varios meses de traballo impulsados pola Federación Galega de Municipios e Provincias (FEGAMP) e coordinados tecnicamente polo Instituto de Seguridade e Saúde Laboral de Galicia (ISSGA). Na súa elaboración participaron UGT Servizos Públicos Galicia, CIG, CCOO Hábitat Galicia, CSIF Galicia, as organizacións empresariais AGESAF e ASADE, así como o Colexio Oficial de Traballo Social. O resultado foi un texto consensuado que, segundo o sindicato, supón un importante avance na protección das persoas traballadoras do sector.
A organización sindical lamentou, porén, a ausencia da Consellería de Política Social e Igualdade no proceso de elaboración do documento, malia estar convocada para participar. UGT considera difícil de comprender esta falta de implicación nunha iniciativa orientada a mellorar a seguridade laboral de milleiros de profesionais dun servizo considerado esencial.
O Servizo de Axuda no Fogar é un sector fortemente feminizado no que as traballadoras desenvolven a súa actividade en domicilios particulares, moitas veces en situacións de illamento e expostas a episodios de insultos, ameazas, agresións ou outras condutas que poden poñer en risco a súa integridade física e psicolóxica. Co novo protocolo establécese por primeira vez en Galicia un procedemento común para previr estas situacións e actuar de maneira coordinada cando se produzan.
Entre as medidas contempladas inclúese a avaliación previa dos riscos laborais nos domicilios antes do inicio da prestación do servizo, a identificación e seguimento dos fogares con maior nivel de risco, a formación específica das profesionais en prevención da violencia e xestión de conflitos, así como a información ás persoas usuarias e ás súas familias sobre os dereitos, obrigas e límites do servizo.
O documento tamén recolle a creación de canles de comunicación e rexistro obrigatorio das incidencias, protocolos específicos para actuar ante ameazas, agresións verbais, agresións físicas ou violencia sexual, e o dereito das traballadoras a interromper a prestación e abandonar o domicilio cando exista un risco grave e inminente para a súa seguridade sen sufrir consecuencias laborais.
Outra das garantías incorporadas é que unha profesional vítima dunha agresión non terá que volver prestar servizo no domicilio onde se produciu o incidente. Ademais, prevese apoio sanitario, psicolóxico e asesoramento xurídico para as persoas afectadas, consolidando o principio de “Tolerancia Cero” fronte a calquera tipo de violencia exercida contra as traballadoras do SAF.
Xunto coa aprobación do protocolo, as entidades participantes subscribiron un documento de compromisos para promover as modificacións organizativas e normativas necesarias que permitan a súa aplicación efectiva. Entre as propostas inclúense a activación da negociación do convenio colectivo do sector, a creación dun Observatorio Autonómico do SAF, a recuperación da obrigatoriedade do informe social nas solicitudes de dependencia, unha liña autonómica de apoio legal e psicolóxico ás vítimas de violencia e o reforzo do financiamento dos servizos sociais, entre outras medidas.
Desde UGT Servizos Públicos Galicia consideran que a aprobación deste protocolo constitúe un fito na protección das profesionais do Servizo de Axuda no Fogar ao establecer por primeira vez un marco común para previr, actuar e facer seguimento das situacións de violencia laboral. Con todo, advirten de que a súa eficacia dependerá da vontade das administracións para dotar aos concellos e ás entidades prestadoras dos recursos humanos, técnicos e económicos necesarios.
O sindicato asegura que continuará traballando para que os compromisos adquiridos se transformen en medidas reais que garantan a seguridade, a dignidade e o recoñecemento das profesionais do sector, insistindo en que quen coida tamén ten dereito a desenvolver o seu traballo con seguridade e sen sufrir ningún tipo de violencia.