Un incendio nunha planta de reciclaxe das Pontes deixa un bombeiro ferido
Un incendio rexistrado este mércores nunha empresa de xestión de residuos do polígono industrial dos Airíos, nas Pontes, obrigou a despregar un amplo dispositivo de emerxencias. O lume comezou arredor das 13.00 horas nunha zona exterior de almacenamento da empresa, onde se acumulaban distintos tipos de residuos.
As lapas afectaron a unha superficie aproximada de 60 metros de longo por 40 metros de ancho e xeraron unha gran columna de fume negro que podía verse desde diferentes puntos da localidade e mesmo desde fóra do municipio. O material acumulado, principalmente lixo, dificultou os labores de extinción e obrigou os equipos de emerxencia a traballar durante varias horas.
O 112 Galicia recibiu numerosas chamadas de veciños alertando do incendio e mobilizou os bombeiros dos parques comarcais do Eume e Vilalba, así como o GES de Mugardos. Tamén participaron efectivos de Protección Civil das Pontes, unha brigada forestal, axentes da Policía Local, a Garda Civil e persoal da Xunta.
O lume quedou controlado antes das 15.00 horas, aínda que permaneceu activo nalgúns puntos, polo que os traballos continuaron durante a tarde.
A propia configuración das instalacións complicou a intervención. A zona conta con diferentes espazos para almacenar residuos, entre eles silos de formigón abertos e pechados, o que provocou que se orixinasen varios focos dentro do recinto. Os bombeiros tiveron que traballar desde o centro da instalación para evitar que as lapas se propagasen.
Durante a intervención, as elevadas temperaturas rexistradas na zona complicaron aínda máis os traballos. Arredor das 16.00 horas, un bombeiro do parque das Pontes sufriu un golpe de calor, polo que tivo que ser evacuado en ambulancia ao Hospital Universitario de Ferrol (CHUF) despois de sentirse mareado.
Os bombeiros de Vilalba finalizaron a súa intervención e regresaron á súa base, mentres outros efectivos permaneceron no lugar para continuar cos labores de arrefriamento e apagado dos residuos que aínda podían manter puntos quentes.
A empresa xa sufrira anteriormente outro incendio. A instalación quedara afectada por un lume previo rexistrado en abril de 2023 en Vilalba, nunha empresa de xestión de residuos do polígono de Sete Pontes, onde as lapas chegaron a calcinar por completo as instalacións.