Vigo abre a inscrición para os campamentos de verán con 4.000 prazas para nenos e nenas
O Concello de Vigo abriu este xoves o prazo de inscrición nos campamentos de verán do programa Verán Xove 2026, que ofertará un total de 4.000 prazas para nenas e nenos de entre 4 e 16 anos.
Tal e como explicou o alcalde, Abel Caballero, esta iniciativa busca facilitar a conciliación das familias durante o período estival, ao tempo que promove valores como a inclusión, a igualdade de oportunidades e a convivencia.
15 campamentos e tres modalidades
O programa inclúe 15 campamentos distribuídos por distintos puntos da cidade e organizados en tres modalidades: campamentos urbanos, espazos lúdicos gratuítos e actividades especiais con pernoita.
As actividades están dirixidas a menores nados entre 2010 e 2022 e desenvolveranse entre o 22 de xuño e o 31 de agosto, cunha duración xeral de 10 días, agás o programa VigoNature, que contará con estadías de cinco días con pernoita.
Horarios e servizos
Os campamentos funcionarán en horario de 8:00 a 15:00 horas, con servizo de entrada temperá desde as 7:45 e saída flexible entre as 14:00 e as 15:15 horas. As familias poderán, ademais, enviar comida tipo friameira para os menores.
Entre os espazos nos que se desenvolverán as actividades están Alcabre, Berbés, Balaídos, Bouzas, Candeán, Casco Vello, Navia, Saiáns ou as instalacións de VigoNature, entre outros.
Inscrición ata o 8 de maio
As solicitudes poden presentarse desde este 23 de abril ata o 8 de maio a través da web municipal www.xuventudevigo.org
.
No caso de que a demanda supere o número de prazas ofertadas, a adxudicación realizarase mediante sorteo, tal e como vén sendo habitual nos últimos anos.
O programa conta cun orzamento de 486.751 euros e consolídase como unha das principais ofertas de lecer estival da cidade.