Vigo acolle a segunda edición do programa “Rueda Academia de Cine”
Do 7 ao 11 de abril, Vigo converterase de novo nun epicentro para a creación audiovisual coa celebración da segunda edición de “Rueda Academia de Cine”. O programa, impulsado pola Academia de Cine e financiado polo ICAA, conta co apoio do Concello de Vigo a través da Vigo Film Office.
A programación inclúe mentorías para proxectos seleccionados, actividades formativas e encontros abertos para o público e centros educativos da cidade. Entre os participantes están a cineasta Pilar Palomero, a actriz Carolina Yuste, o guionista Fran Araújo e o realizador galego Lois Patiño.
O 8 de abril, o Museo MARCO acollerá a proxección de Los destellos, seguida dun coloquio con Palomero. O 10 será a quenda de Infiltrada, no Auditorio Municipal, con coloquio posterior con Carolina Yuste.
O Espazo Redeiras da Universidade de Vigo será escenario das formacións e encontros, e haberá actividades paralelas como un percorrido pola ría o día 9 e un taller de cinema táctil en 16 mm o día 10. Tamén se realizarán sesións nos centros IES Valladares, o Instituto Audiovisual de Bouzas e a Fundación Igualarte.
O programa “Rueda” facilita o desenvolvemento de proxectos cinematográficos a persoas con dificultades de conciliación ou limitacións territoriais, apostando pola descentralización e a diversidade de voces no cinema español.