Vigo acollerá en outubro os European Police & Fire Games con 3.000 policías e bombeiros de toda Europa
A cidade de Vigo acollerá entre o 2 e o 11 de outubro a XI edición dos European Police & Fire Games, un evento deportivo internacional que reunirá a arredor de 3.000 profesionais das forzas da orde e emerxencias procedentes de máis de 40 países.
A presentación oficial contou coa participación do alcalde da cidade, Abel Caballero, acompañado por representantes das forzas de seguridade e dos equipos organizadores da competición. O Concello de Vigo apoiará a celebración do evento cunha achega económica de 300.000 euros.
Durante o acto, Caballero destacou a relevancia dun evento que contará con máis de 90 probas deportivas repartidas en arredor de 50 disciplinas diferentes.
O alcalde subliñou que a celebración desta competición suporá unha importante mobilización internacional e cualificou a cita como unha “ONU deportiva”, pola presenza de profesionais procedentes de numerosos países europeos.
Na presentación estiveron presentes o comisario principal da Policía Nacional en Vigo, Ramiro José Gómez, a comisaria da cidade, Miriam Rifai, o xefe da Policía Local, Alberto Carballo, e o subjefe do Servizo de Bombeiros, Miguel Estévez.
Tamén participaron membros da organización do evento, entre eles José Carlos Baquero, xunto con Ricardo Tilve, Carlos Ferrer e Israel Lubiáns.
O alcalde destacou que a celebración dos xogos reforza o papel de Vigo como sede de grandes eventos deportivos e institucionais. Neste sentido, lembrou que a cidade tamén acollerá o desfile das Forzas Armadas o próximo 30 de maio.
Pola súa banda, o presidente dos xogos agradeceu ao Concello de Vigo a acollida e o apoio institucional para celebrar na cidade o 20 aniversario desta competición, que se organiza cada dous anos.