Buscan 40 paxes para acompañar aos Reis Magos na Cabalgata do 5 de xaneiro de Vigo
O Concello de Vigo continúa cos preparativos para recibir ás Súas Maxestades de Oriente na tarde do luns 5 de xaneiro. Un ano máis, o goberno municipal ofrece a posibilidade de que 40 nenas e nenos da cidade participen como paxes reais acompañando a Melchor, Gaspar e Baltasar nas carrozas da tradicional cabalgata.
As crianzas deben ter nacido entre xaneiro de 2013 e decembro de 2017 —ambos incluídos— e non poderán presentarse aquelas que xa fosen seleccionadas en convocatorias anteriores. A inscrición formalizarase mediante unha solicitude que estará dispoñible nos próximos días na web municipal www.vigo.org
, e as prazas asignaranse mediante sorteo público o 16 de decembro no Auditorio Municipal.
O período de presentación de solicitudes abrirase este xoves, 20 de novembro, e permanecerá activo ata o 10 de decembro. As peticións deberán depositarse nas caixas de correo do Carteiro Real, que se instalarán tanto no Concello como nos centros cívicos de Teis, Casco Vello, Coruxo e Saiáns.
Coa apertura deste proceso, o Concello dá un novo paso nos preparativos da Cabalgata de Reis, un dos eventos máis esperados do Nadal vigués, que cada ano reúne milleiros de familias nas rúas da cidade.