Vigo celebra a excelencia do sector farmacéutico nos Premios Excelencia Farmacéutica 2025
Vigo converteuse no epicentro do sector farmacéutico coa celebración da III Edición dos Premios Excelencia Farmacéutica, organizados por ACMfarma, que reuniu máis de 300 profesionais para recoñecer o seu compromiso coa saúde e coa innovación.
Durante a gala entregáronse sete galardóns que destacaron o labor de farmacéuticos e farmacias de todo o Estado. Na categoría de Farmacia Galega Destacada, o premio foi para a farmacia Cimadevila (@cimadevilasalud) de Boiro, mentres que o recoñecemento á Farmacia Destacada en España recaeu na farmacia Masquefa (@farmaciamasquefa) de Barcelona.
O galardón de Nova Promesa foi para César Pla de Alacant; o de Innovación Farmacéutica para Mónica Lizondo de Barcelona; e o de Técnica Destacada para Angie Mejías. Pola súa parte, Pilar de Pedro de Madrid foi recoñecida como Mellor Farmacéutica Comunicadora, e o Premio Excelencia Farmacéutica foi para a mallorquina Teresa Bonnín.
O CEO de ACMfarma, Juan Carlos Ogando, destacou “o compromiso, a profesionalidade e a paixón dos farmacéuticos, que son o primeiro elo da cadea da saúde”. Nesa mesma liña, o alcalde de Vigo, Abel Caballero, puxo en valor a función social das farmacias, “espazos nos que depositamos a nosa confianza”.
O xurado, presidido por Fran Diéguez, subliñou a dificultade da elección entre as 21 candidaturas presentadas, procedentes de todo o Estado. Na súa deliberación participaron referentes do sector como Virtu Roig, Teté Cachafeiro, Tamar Troncoso e Montse Iracheta, valorando aspectos como a innovación, a comunicación e a excelencia global.
A gala, amadrinada por Gema Herrerías por terceiro ano consecutivo, foi presentada por Yolanda Galiana e o divulgador científico Alfredo Corell.