Vigo estrea o Centro de Interpretación da candidatura das Illas Cíes
O alcalde de Vigo, Abel Caballero, visitou este xoves o Centro de Interpretación da candidatura das Illas Cíes a Xeoparque Mundial da Unesco, situado na Oficina Municipal de Turismo da rúa López de Neira. Este novo espazo nace co obxectivo de achegar á cidadanía e ás persoas visitantes os valores xeolóxicos, ambientais e científicos do arquipélago.
O Centro acolle unha exposición con paneis explicativos sobre o patrimonio natural das Illas Cíes. A mostra aborda o papel dos Xeoparques Mundiais na conservación da xeodiversidade, a evolución xeolóxica das illas desde a Orogenia Hercínica ata a actualidade, os principais Lugares de Interese Xeolóxico (LIX) e a súa relevancia científica, así como a biodiversidade e a protección ambiental no marco do Parque Nacional Marítimo-Terrestre das Illas Atlánticas e da Rede Natura 2000.
O espazo conta con recursos dixitais como unha tablet con contidos interactivos para localizar e comprender os LIX das illas, audioguías en galego, castelán e inglés adaptadas a persoas con discapacidade e unha pantalla para visualizar materiais vinculados á candidatura.
Durante a visita participaron membros do Comité Científico da candidatura, persoal da Universidade de Vigo e responsables da creación do novo espazo. Caballero destacou o traballo científico e divulgativo desenvolvido para apoiar a candidatura das Illas Cíes como Xeoparque Mundial.