Vigo impulsa unha ordenanza para regular as vivendas de uso turístico e garantir o dereito á vivenda
O Concello de Vigo deu un novo paso na regulación das vivendas de uso turístico coa aprobación en Xunta de Goberno do proxecto de ordenanza municipal que establecerá as condicións para a implantación e explotación deste tipo de aloxamentos na cidade.
Segundo explicou o alcalde, Abel Caballero, esta normativa enmárcase no novo Plan Xeral de Ordenación Municipal (PXOM), que xa regula o uso terciario destas actividades, e parte da consideración de que as vivendas de uso turístico están destinadas ao aloxamento temporal, sen carácter de residencia habitual.
A ordenanza establece como requisito imprescindible contar cun título habilitante previo para poder desenvolver a actividade. Tal e como sinalou o rexedor, esta medida busca ofrecer “seguridade xurídica tanto ás persoas titulares das vivendas como aos veciños e veciñas”.
Entre os aspectos máis relevantes da normativa, recóllese que as vivendas de uso turístico só poderán situarse en edificios de uso completo destinados a este fin ou ben en plantas baixas e altas, sempre que se garanta a independencia de accesos respecto ás vivendas residenciais. Ademais, prohíbese expresamente a implantación deste tipo de aloxamentos en vivendas que fosen rehabilitadas ou reformadas con axudas públicas, así como naquelas que conten con algún tipo de protección.
Outro dos puntos destacados é a posibilidade de que o Concello de Vigo declare, logo dos correspondentes estudos e trámites administrativos, zonas saturadas ou de intensidade limitada, podendo afectar a barrios, rúas ou áreas concretas do termo municipal, co fin de evitar impactos negativos sobre a convivencia e o mercado da vivenda.
En canto á tramitación, o proxecto de ordenanza será aprobado inicialmente polo Pleno municipal e someterase posteriormente a un período de información pública de 30 días hábiles, durante o cal a cidadanía poderá presentar alegacións ou suxestións. De non rexistrarse alegacións, a norma quedará aprobada definitivamente; no caso contrario, será necesario elaborar o correspondente ditame e sometelo a unha nova aprobación plenaria.