Vigo investirá 1,9 millóns no novo corredor con ramplas entre Travesía e Aragón
A Xunta de Goberno do Concello de Vigo aprobará mañá o proxecto dun novo corredor urbano que conectará as rúas Travesía de Vigo e Aragón a través dun percorrido de 200 metros de lonxitude dotado con tres ramplas mecánicas. A actuación, cun investimento de 1,9 millóns de euros, forma parte do modelo Vigo Vertical e permitirá salvar un desnivel de 20 metros entre as zonas norte e sur da cidade.
O alcalde, Abel Caballero, cualificou esta intervención como “unha das grandes obras da historia da cidade”, destacando que se converterá nun “gran corredor para moverse en zonas de gran desnivel”.
Segundo explicou o rexedor, o investimento municipal neste proxecto ascende a 1.913.000 euros, aos que se suman outros 2.850.000 euros destinados á creación do macroparque infantil Finca Matías, polo que o conxunto da actuación nesta zona alcanza os 4.763.000 euros.
O corredor estrutúrase en tres tramos: un primeiro de 60 metros na rúa Travesía de Vigo; un segundo, de preto de 100 metros, onde se instalarán as tres ramplas mecánicas, con lonxitudes de 24, 25 e 29 metros; e un terceiro tramo final de 40 metros que conectará co parque e coa rúa Toxal. O ámbito das ramplas contará con zonas peonís, novo arborado, bancos e varandas.
Entre os obxectivos da intervención destacan a creación dunha nova conexión mecánica entre Travesía de Vigo e Aragón, a xeración dunha gran área de lecer para distintas idades e a humanización das rúas Rosario Hernández Diéguez e Toxal. Ademais, o proxecto inclúe a renovación completa das redes de servizos, a instalación de nova iluminación e mobiliario urbano.
Caballero sinalou que esta actuación, xunto coa construción do maior parque infantil da cidade, reflicte “o modelo do Vigo novo” que o Concello está a desenvolver en distintos barrios e avanzou que haberá novas intervencións deste tipo no futuro.