Actualidade

O Concello destina 218.000 euros á creación de 13 murais e á recuperación doutros dous na XII edición de “Vigo, cidade de cor”.

O alcalde de Vigo, Abel Caballero, anunciou a posta en marcha da XII edición do programa “Vigo, cidade de cor”, que permitirá actuar en 15 medianeiras da cidade —13 novas intervencións e 2 murais que se renovarán— cun investimento total de 218.000 euros.

Caballero destacou que a iniciativa supón “o embelecemento da cidade” e vai máis alá do plano estético. Segundo indicou, os murais transforman visualmente os espazos urbanos e contribúen á súa recuperación e revitalización, mellorando tamén a percepción e o contexto humano dos barrios.

As intervencións realizaranse en diferentes puntos da cidade, entre eles a pista polideportiva de Teis (Laura Álvarez), a pista deportiva Anduriña (Colectivo Imperdible), a pista deportiva Verderol (María Corrales), a rúa Tomás Alonso (Liqen) ou a avenida de Castelao (Tirso Paz).

Tamén haberá actuacións na rúa Pardillo (Iria Prol), na rúa Toxal (Habraham Barrios), no Camiño Cordoeira (Vanesa Álvarez), nas escaleiras de Vázquez Varela (Raquel de la Coba) e nas escaleiras da rúa Colombia, no barrio de Ribadavia (Roberto Argüelles).

Completa a listaxe o peche do Colexio María Inmaculada (Cristina Pino e Gustavo Suasnabar), a rehabilitación dun mural no barrio de Ribadavia (David Lorenzo), a recuperación doutro na Asociación Veciñal de Lavadores (Anthony), así como actuacións na rúa Hispanidade e na rúa Cataluña.

Con esta nova edición, Vigo suma arredor de 190 murais distribuídos por toda a cidade, consolidándose como un referente da arte urbana e como un auténtico museo ao aire libre.