Xuntas polo Territorio pide paralizar un novo parque eólico en Chantada pola saturación enerxética da comarca
A Asociación Xuntas polo Territorio formalizou no rexistro público as súas alegacións contra o proxecto do Parque Industrial Eólico Monte Cabeza II, reclamando a suspensión das autorizacións administrativas pola grave saturación enerxética que, segundo denuncia, xa padece a zona. A entidade sostén que o impacto acumulado sobre a poboación, o medio ambiente e a economía local fai inviable a execución dun novo parque nestas condicións.
Segundo explica a asociación, o proxecto sumaría seis novos aeroxeradores a unha contorna que xa conta con máis de 120 muíños en funcionamento, ademais de alertar sobre o risco derivado da súa hibridación cun macrocomplexo de baterías e subestacións coñecido como Soilán II. Para Xuntas polo Territorio, o territorio non ten capacidade para asumir máis infraestruturas enerxéticas, polo que solicita que non se conceda ningunha autorización mentres non se realice unha avaliación ambiental rigorosa dos impactos acumulados e sinérxicos.
Efectos acumulativos e capacidade de carga
Un dos eixos centrais das alegacións é que a normativa ambiental obriga a valorar a suma total dos impactos sobre o territorio, e non cada expediente de forma illada. A entidade denuncia que a área xa soporta unha densidade extraordinaria de liñas de alta tensión, subestacións e parques eólicos, tanto en funcionamento como en tramitación, entre eles outras iniciativas próximas na comarca.
Un "hub" enerxético de gran magnitude
As alegacións apuntan a que Monte Cabeza II se conectaría directamente coa subestación Soilán II e con varios proxectos de almacenamento enerxético veciños. Segundo os cálculos da asociación, este conxunto de instalacións, sumado a outros parques do corredor lucense, podería alcanzar entre 1.000 e 1.300 MW de potencia agregada nun mesmo hub enerxético situado nesta zona da provincia de Lugo.
Poboación, actividade agraria e seguridade
A entidade reclama comprobar a distancia real das instalacións respecto a vivendas e explotacións gandeiras, avaliando cuestións como o ruído, o tránsito de maquinaria e a posible depreciación do solo rural. Tamén esixe unha valoración específica do risco derivado da instalación de centos de colectores de baterías de litio a escasos metros de núcleos habitados, ante a posibilidade de sobrequecemento térmico e emisión de gases tóxicos en caso de incidente.
Auga, patrimonio e biodiversidade
A asociación alerta ademais sobre os posibles danos a acuíferos e traídas de auga veciñais, así como sobre a afección á paisaxe e ao valor cultural da contorna da Ribeira Sacra. Reclama tamén unha avaliación específica do risco de colisión para a fauna protexida.
A petición da "alternativa cero"
A oposición ao proxecto Monte Cabeza II non é illada: outra formación local, á marxe da vía institucional do rexistro de alegacións, presentou tamén escritos contra a mesma iniciativa e as súas infraestruturas de evacuación asociadas, insistindo igualmente na necesidade de avaliar os efectos conxuntos de toda a concentración enerxética da zona. Xuntas polo Territorio conclúe demandando a aplicación efectiva da chamada "alternativa cero", é dicir, a non execución do proxecto, ao consideralo a única opción racional ante o grao de saturación e sobrecarga que padece xa o municipio de Chantada.