XXIV Festa do Mar de Combarro: Luis López destaca o mar como gran atractivo da etapa pontevedresa da Vuelta
A XXIV Festa do Mar de Combarro arrancou este xoves no Concello de Poio e prolongarase ata o domingo 31 de agosto como unha das citas gastronómicas e culturais máis tradicionais das Rías Baixas. O acto de apertura contou coa presenza do presidente da Deputación de Pontevedra, Luis López, do alcalde Ángel Moldes e da conselleira de Vivenda e Infraestruturas, María Martínez Allegue.
Luis López salientou que o mundo do mar ligado a Combarro será un dos grandes atractivos da etapa pontevedresa da Vuelta a España, que sairá desta histórica vila mariñeira o vindeiro 9 de setembro. “A Festa do Mar non é só unha festa gastronómica, é unha exposición do que somos os que temos a sorte de vivir en Poio e nesta provincia”, destacou.
O presidente provincial puxo en valor o bo momento do turismo nas Rías Baixas, un sector que segue medrando e internacionalizándose, grazas ao labor conxunto de profesionais, veciñanza e administracións locais. Destacou tamén o traballo do Concello de Poio na mellora da convivencia e dos servizos, como o incremento de prazas de aparcamento.
Ademais, López reivindicou a esencia de Combarro como emblema da calidade de vida da provincia, cun estilo baseado na relación co mar, nas tradicións e na hospitalidade. “Combarro é moito máis ca unha parada obrigada, é o reflexo dun xeito de vida que nos enche de orgullo e felicidade”, sinalou.
Antes de convidar á cidadanía a achegarse á festa esta fin de semana, agradeceu o labor das entidades organizadoras e reafirmou o compromiso da Deputación de seguir colaborando cun evento que reforza a posición da provincia como referencia turística. “Os turistas veñen pola beleza da nosa terra, pero sempre volven polo exquisito trato que reciben”, concluíu.