Contedores en Lugo
O grupo municipal de Ciudadanos en Lugo vén de criticar a “decepcionante falta de interese amosada polo goberno local” en materia de reciclaxe.
O concelleiro Juan Vidal-Pardo asegura que, nos dous últimos anos, a cidade “non avanzou nin un centímetro” nese sentido. Mostra diso é, dixo, que non se ampliaron os puntos de provisión nin os contedores específicos nos actuais lugares de recollida. Ademais sinalou directamente á xestión realizada polo departamento de Medio Ambiente, dirixido polo socialista Álvaro Santos, ao que acusa de “desentenderse do problema xeral” de recollida e xestión de residuos.
“Unha cidade coas características de Lugo, a súa conexión co medio natural e a súa relación cos acuíferos da súa contorna, non se pode permitir non reciclar os aceites usados ou carecer de puntos de recollida para pilas e baterías, escasísimos no conxunto do entramado urbano. A falta de dilixencia mostrada polo executivo de Lara Méndez supón un risco real para o equilibrio do noso ecosistema. Un litro de aceite contamina máis de 1.000 litros de auga segundo os expertos”, sinalou Vidal-Pardo.
Para o edil da formación laranxa, é “intolerable o escaso compromiso mostrado por PSOE e BNG coa reciclaxe e a conservación do noso medio natural. É inconcibible que en pleno século XXI o noso municipio careza dun sistema de reciclaxe de aceites usados efectivo, xa que os puntos actuais para levar a cabo esta reciclaxe son anecdóticos. O mesmo sucede coas pilas e as baterías. Non comprendemos tampouco como o quinto contenedor non foi instalado nin tan sequera como proba piloto en varias localizacións”.
Desde Ciudadanos consideran que en Lugo hai un sistema de lixo “obsoleto e mal dimensionado, que data dos anos 90 do século pasado”. As consecuencias desta falta de xestión tradúcese, din, “nun risco real para o noso ecosistema e nunha cidade sucia, aspecto que deteriora a calidade de vida dos veciños e veciñas”.
“O señor Santos cre que o problema xeral do lixo soluciónase co anuncio dunha nova licitación, con todo as rúas seguen sucias e a contorna dos contendores énchense de lixo o que está a xerar episodios de malos cheiros, xa que termina por esparcirse pola rúa», rematou Vidal-Pardo.
Respecto ao sistema de recollida de aceite, Ciudadanos estima que non pode limitarse a unha “instalación testimonial” e aseguran que existen “exemplos a nivel nacional” de que a aposta pola reciclaxe é rendible para a administración local. “Cidades con características extrapolables a Lugo, como Vitoria, conta desde 2019 con 121 puntos de recollida de aceite sen custo para o Concello e ademais inclúe a recolleita do aceite en edificios públicos como centros cívicos e equipamientos educativos”, asegurou.
