O Consello de Administración de Adif autorizou, na súa última reunión, a adxudicación do contrato para a construción do túnel de Oural, situado entre O Incio e Sarria, no tramo Monforte de Lemos-Lugo, por un importe de 50.755.387,21 € (IVE incluído). O contrato foi adxudicado á empresa Ferrovial Construción e conta cun prazo de execución de 29 meses e 21 días.
A construción do novo túnel de Oural forma parte dos proxectos de modernización do corredor ferroviario Ourense-Monforte de Lemos-Lugo e perseguen unha dobre finalidade: mellorar o estado da infraestrutura e aumentar a fiabilidade das liñas e a calidade do servizo.
Esta actuación contribuirá á consecución do Obxectivo de Desenvolvemento Sostible ( ODS) 9 (Industria, Innovación e Infraestrutura), que ten entre as súas metas o desenvolvemento de infraestruturas fiables, sostibles, resilientes e de calidade.
Novo túnel de Oural
O contrato adxudicado comprende as obras de construción do novo túnel de Oural, de 1,85 km de lonxitude, que substituirá ao túnel existente en servizo, mellorando as súas prestacións.
O novo túnel executarase paralelo ao existente, que se manterá como galería de emerxencia, e dispoñerá de espazo suficiente para albergar a catenaria, así como aceira de emerxencia e galerías de evacuación, entre outros elementos.
A estrutura exponse cunha sección de 52 m2 en vía única (do mesmo xeito que os tramos adxacentes), que se executará desde as dúas frontes de escavación para minimizar os prazos de execución. A montaxe de vía efectuarase en placa no interior do túnel e parte do exterior, con pasos biviales para o acceso de vehículos de emerxencia ou mantemento.
O túnel contará con liña área de contacto (catenaria), sistemas de sinalización e comunicacións adaptados á nova solución proxectada, sistema de ventilación e sistemas de protección civil, así como instalacións de telecomunicacións e dúas zonas de instalacións auxiliares (ZIA), unha en cada emboquille.
Executaranse tres galerías transversais de evacuación, cunha distancia máxima de 500 m entre unha e outra. A sección de galería central será apta para vehículos, mentres que as laterais serán de tipo peonil.
A adecuación do túnel existente como galería de emerxencia implicará a retirada de vía e balasto, a execución dunha soleira de formigón transitable, así como un tratamento de impermeabilización. O contrato inclúe a execución dun paso superior e dous camiños de emerxencias, un para cada boca.
Melloras no traxecto Ourense-Monforte de Lemos-Lugo
As actuacións de mellora do tramo en servizo Ourense-Monforte de Lemos-Lugo teñen como obxectivo cumprir os compromisos de Adif coa optimización das condicións de explotación comercial do traxecto, en parámetros tales como a fiabilidade, o confort e os tempos de viaxe.
Os traballos previstos inclúen a modernización e adecuación das instalacións existentes, así como a electrificación a 25 kV en corrente alterna do corredor, adaptando a electrificación existente no tramo Ourense-Monforte de Lemos e dotando de catenaria e instalacións eléctricas ao tramo Monforte de Lemos-Lugo.
A primeira destas melloras, a variante da Pobra de San Xiao, entre Monforte de Lemos e Lugo, xa está en servizo desde abril de 2018. Entre os principais beneficios deste novo trazado, duns 7 quilómetros de lonxitude, destaca a supresión dos 14 pasos a nivel do anterior traxecto, co consecuente aumento da seguridade ferroviaria, viaria e peonil, así como o incremento da velocidade de paso dos trens ata o 160 km/ h.
