A Deputada de Réxime Interior, Promoción do Territorio e Turismo, Pilar García Porto, participou este luns na apertura da presentación do obradoiro promovido pola USC do que sairán os proxectos para a renovación da Vaguada do Campus. Entre o xurado que valorará as propostas estará unha técnica da institución provincial.
García Porto deu a benvida ao alumnado deste obradoiro, dirixido principalmente aos alumnos do grao de Paisaxe e de Enxeñaría Agrícola da Escola Politécnica Superior, e animounos a aproveitar a oportunidade que lles “permitirá reflexionar sobre a paisaxe da súa contorna, porque é necesario redeseñar con criterios como a mobilidade, a sustentabilidade, a perspectiva de xénero os espazos públicos, pero tamén a relación entre o Campus e o seu contorno urbano”.
“Estou segura tamén, de que con este tipo de traballos vaise reforzar, non só a formación académica, senón tamén eses lazos de convivencia que marcan a personalidade dos grandes centros universitarios e os converten nun orgullo para a cidadanía e nun destino preferencial para alumnos e profesorado”, indicou a Deputada.
O obradoiro sobre a Vaguada do Campus permite aplicar os coñecementos nun traballo real, concreto e vencellado á contorna dos estudantes. Así mesmo, permitirá contar cun novo espazo de lecer a carón da natureza para o alumnado universitario pero tamén para todos os veciños e veciñas da provincia.
