O vicevoceiro do Grupo Municipal do Partido Popular no Concello de Lugo, Antonio Ameijide, urxe ao goberno local a planificar e proceder á renovación da rede de subministro de auga naquelas zonas do polígono do Ceao nas que a presión da auga é moi pequena para garantir o acceso no caso de emerxencia.
Ameijide fai esta petición despois de ter acceso aos informes municipais derivados do incendio que tivo lugar no polígono do Ceao o pasado mes de abril, suceso tralo cal dende o Grupo Municipal Popular se felicitou aos servizos de emerxencias pola súa magnífica labor, pero tamén se criticou a falta de presión de auga coa que tiveron que afrontar ese suceso. Neses informes certifícase a sospeita dos populares, “que a falta de presión de auga dificultou enormemente as tarefas dos servizos de extinción de incendios”, pese ao cal conseguiron controlar as lapas e sofocar o incendio.
Segundo os informes municipais, a presión de auga nas rúas onde tivo lugar o incendio tiñan unha presión moi baixa, de entre 0.6 e 0,8 kg/cm2, mentres que, por exemplo, na rúa dous carpinteiros, á carón da ITV hai presións de 3,8 kg/cm2. “Queda claro que a mínima presión de auga coa que tiveron que afrontar o incendio os bombeiros foi o seu gran rival xunto ás lapas”, criticou.
Para o popular urxe a renovación da rede, xa que no caso de que o goberno local optase por aumentar de inmediato a presión de auga correríase o risco, nunha porcentaxe moi elevada, de sufrir rebentóns ou roturas na rede xa que as tubaxes son moi antigas, de fibrocemento, polo que moitas delas xa superaron con creces a súa vida útil. “A realidade non é que non hai presión suficiente de auga, senón que as tubarias tampouco son capaces de asumila no caso de que se lle meta máis presión”, lamentou.
Unha solución que plantexan os populares e tamén o servizo municipal de enxeñería, xa que no informe falan da necesidade da planificar un plan director do ciclo da auga e, dentro dese plan director, facer unha planificación e propostas de intervención para mellorar a rede de servizos. “Dende o primeiro minuto xa o advertimos, nos e todos os afectados do incendio, pero semella que os únicos que non quixeron ver a realidade eran a alcaldesa e os seus concelleiros que tiñan como única preocupación dicir que a falta de presión de auga non era verdade”, criticou.
Aumentar o número bombeiros
Outra das conclusións que se extraen destes informes é que o servizo municipal de extinción de incendios “fixo o posible e o imposible” para apagar o incendio, a pesar da pouca presión de auga e de que contan cun cadro de persoal que necesita moito máis reforzo e mais persoal, xa que dos case 100 bombeiros que debería haber, segundo as directivas europeas, non hai nin sequera a metade. “Reiteramos o noso máximo agradecemento aos bombeiros de Lugo xa que á vista dos medios dos que dispuxeron realizaron unha labor rápida e efectiva a pesar dos problemas que tiveron”, finalizou.
