A empresa eléctrica Endesa recibirá durante a segunda quincena do mes de marzo dous buques carboeiros na súa terminal do porto exterior de Caneliñas, en Ferrol, que tras desestibar a mercadoría será levada por estrada ata As Pontes, para a súa central térmica.
O complexo industrial está actualmente en reparación e o persoal propio e as compañías auxiliares teñen prorrogado o seu contrato ata o próximo 31 de maio.
Os buques transportarán nas súas adegas un total de 235.000 toneladas de carbón, repartidas en 70.000 nun dos barcos e os 165.000 restantes noutro.
A finais do pasado ano Endesa xa recibiu varios cargamentos de carbón para reactivar a central, que aínda así mantén o proxecto de peche. En outubro chegou o primeiro buque, con 80.000 toneladas, a mediados de novembro outro con 20.000 e xa en decembro arribaron outras 77.000 toneladas. A térmica das Pontes reactivouse parcialmente o 22 de novembro de 2021 nun dos catro grupos.
