Esta mañá comezaron os traballos de renovación de elementos urbanos da cidade que ten como fin acondicionar diferentes zonas verdes da capital que precisaban dalgún arranxo. O inicio destes labores tiveron lugar no parque de Fontiñas coa substitución do valado de madeira .
Son pequenas intervencións que, terán un gran alcance na confortabilidade que ofrecen estes espazos grazas á mellora que suporá para a súa seguridade e para a súa imaxe a renovación dos peches perimetrais, dos pavimentos ou do mobiliario urbano que conteñen e que, a continuación, se porán a disposición da cidadanía para o seu uso e desfrute en excelentes condicións.
Estas actuacións, orzamentadas en 48.312’88 euros, se estenderán posteriormente por outros puntos da capital como o parque Marcos Cela, a contorna da Estación do Ferrocarril, a Avenida de Magoi ou o paseo fluvial do Miño. En total, o Concello agarda que as tarefas non se prolonguen máis aló dun mes, a fin de que, de cara a primavera, os veciños poidan gozar das contornas xa renovadas.
As obras consistirán, fundamentalmente, na adecuación e instalación de diversos elementos presentes neses parques e zonas verdes da cidade, facendo especial énfase na rehabilitación de valados, a adecuación de superficies de paso, a colocación de bolardos así como a renovación de bancos e mesas.
Deste xeito, no parque de Fontiñas, se substituirán varios tramos do peche de madeira do recinto (120 m) e, a maiores e debido á orografía e ao estado no que se atopa o firme do paseo, acometerase tamén unha estabilización do terreo mediante a execución dun bordo de madeira, a instalación dunha lámina de xeotextil e unha achega de terra vexetal ao longo de 12 metros lineais.
No caso do Parque Marcos Cela, renovarase o valado perimetral externo da área infantil, cunha lonxitude total de 100 metros, e farase un lavado dos chanzos de formigón existentes que dan acceso ao mesmo desde a vía e a execución dun novo bordo de formigón que asegure ditas escaleiras cunha lonxitude total de 150 metros. Por outra parte, no paseo propio que conecta este Parque coa Volta da Viña e a Avenida de Magoi se rehabilitarán 24 metros de cerca e se instalarán outros 100 metros a maiores.
Xa no aparcamento existente na marxe oeste da rúa Montero Ríos, á altura do paso superior ás vías do tren, existe un valado perimetral de madeira que é danado sistematicamente polos vehículos que o usan. Aquí colocarase unha liña de bolardos, retranqueados a 1’5 metros dende o cerrume e separados entre si a esa mesma distancia, para evitar que continúe a deterioración do mesmo.
E na confluencia da Avenida de Magoi e a Rolda da República Arxentina, o Concello actuará sobre dúas parcelas, sen edificar, nas que se extraerán os 200 bolardos que as delimitan actualmente para evitar o estacionamento de vehículos no seu interior e se cimentarán e substituirán, na mesma proporción, por outros novos.
Na zona verde do Paseo Fluvial do río Miño, e logo de que nos últimos anos se realizaran diversas actuacións para mellorar as inmediacións, agora procederase á instalación de 4 mesas tipo picnic e a renovar os 14 bancos mediante un lavado a presión da superficie e a renovación das lamas de madeira que se atopen estragadas.