As obras das Caldas do Miño avanzan ao ritmo previsto. Comezaron no pasado mes de outubro e o prazo de construción é dun ano.
O equipamento, que será de uso público y gratuíto, sitúase nunha extensión de case 400 m² dentro dunha parcela de 84.000 m² situada ao carón do Pazo de Feiras.
A estrutura levantada deixa ver xa as sete caldas, cinco de auga quente e dúas de auga fría, así como o edificio de baños e vestiarios. Actualmente xa se finalizou o formigonado das piscinas e estase a recubrir de terra o entorno das mesmas, ao tempo que se executa a impermeabilización, traballos todos eles, que manteñen os máximos parámetros de eficiencia enerxética.
Desde un punto de vista medio ambiental, o equipamento execútase tras unha avaliación previa do impacto ambiental co fin de que o proxecto sexa respectuoso e integrado coa localización privilexiada no que se enmarca.
Así mesmo, Méndez lembrou que a auga se quentará a través dun sistema de aerotermia, enerxía que se obtén a partir de fontes naturais e renovables, reducindo o gasto enerxético e a mínimos a pegada de carbono que se xeraría cunha instalación que non estivese á altura dun proxecto innovador e de primeiro nivel que require unha cidade como Lugo.
O obxectivo deste proxecto e crear unha nova dotación de recreo para os e das lucenses, que poderán gozar dunhas instalacións eficientes e modernas nun magnífico escenario natural como é a contorna do Miño.
As caldas serán tamén un gran revulsivo cultural, ao estar inspiradas nas termas romanas, e un novo recurso turístico, xa que moi preto pasa o Camiño Primitivo, polo que poden converterse nunha etapa de parada e de descanso para os peregrinos que escollen este itinerario xacobeo, así como para a atracción de visitantes vinculados ao turismo de experiencias, que se atopa en auxe e que permitirá captar un turismo de calidade.
Neste ano, aínda non convivirán as caldas coa plataforma fluvial do Miño. A plataforma estará lista este verán e as caldas estarán rematadas a finais de ano, pero mentres a praia estará só en uso os tres meses de estío, as caldas estarán abertas todo o ano.
As caldas son un proxecto enmarcado na estratexia DUSI Muramiñae, financiada ao 80% pola Unión Europea, a través dos fondos FEDER, e cuxo obxectivo é unir a trama urbana de Lugo coa súa contorna fluvial, para acadar unha cidade máis sostible, verde, innovadora e moderna.
