Integrantes do Partido Popular do municipio de Láncara celebran que hai xusto un ano, dábanse por finalizadas estas obras coas que se acadaba o ensanche da ponte e a construción dunha glorieta. Ademais, da construción dun muro na ponte.
O PROXECTO
Os traballos, que no seu día supuxeron a escavación de máis de 15.000 metros cúbicos e o emprego de máis de 1.000 toneladas de mestura asfáltica, leváronse a cabo cun orzamento de 599.845 euros.
No que á ponte se refire, o ensanche realizouse nun tramo de 500 metros e precisou do relevo de parte da terra da bóveda por cemento, así como a instalación de 513 metros cadrados de prelousa, armadura, ferro e formigón para ampliar o ancho dos 6 metros actuais ata os 10.
Converteuse na obra máis complexa de executar dunha actuación global que contemplou tamén a creación dunha rotonda que xestiona toda a circulación da LU-621 con Valdriz, o que supuxo unha maior seguridade para o tráfico rodado nun cruce bastante perigoso.
Igualmente, esta iniciativa xestionou a creación dunha senda peonil dende o derradeiro tramo de pavimento da Pobra de San Xillao ata a nova rotonda de acceso a Valdriz.
