Arenal Emevé de Lugo logrou unha vitoria histórica na segunda edición do Campionato de España júnior feminino, disputado no Século XXI de Zaragoza fronte a Barcelona Barça.
Unha abarrotado bancada, con máis de 550 espectadores e con dúas afeccións moi entregadas, puido gozar dun gran encontro con dous equipos de alto nivel loitando polo cetro nacional, unha gran final na que as lucenses tiveron que empregarse a fondo para coroarse como campioas de España.
Desde o comezo do encontro, as xogadoras do Emevé de Lugo demostraron destreza, determinación en ataque e a pesar dos esforzos titánicos das catalás, especialmente polo centro, as galegas foron superiores, pechando o partido por 3 sets a 0 (21-25; 14-25 e 23-25). A colocadora do Arenal Emevé, Ainara Burgo, foi elixida como a MVP da competición.
Ademais, tamén o equipo masculino desta categoría disputou a fase nacional en Soria obtendo unha meritoria cuarta praza, xa que perdeu na final ante o Leganés por 3-0. Competían polo título 24 equipos de toda España, campiones nas súas comunidades autónomas.
Ademais, Lugo acolleu estes días o Campionato de España infantil feminino, coa presenza de 32 equipos. O Emevé, anfitrión do evento e campión galego, ocupou a sétima praza e o outro equipo da provincia, o Korbis, fíxose coa décimo quinta.
Nas Palmas de Gran Canaria tivo lugar o infantil masculino, no que a sexta posición foi para o monfortino Korbis pero o Emevé ocupou a praza número 15 da xeral, na que había 24 equipos.
