A Asociación de Empresarios Lugo Monumental presentou na Praza do Campo os dous modelos de bandeiras que lucirán os establecementos asociados a Lugo Monumental que así o desexen.
Trátase de dous modelos de bandeirolas, un romano e outro castrexo, deseñados por Lucía Barrios e que se expoñerán en fachadas e escaparates dos locais que decidisen participar nesta iniciativa. Elaboráronse 100 bandeiras de cada modelo, e tendo en conta o seu respectable tamaño (2 metros de longo por 0,65 de ancho) búscase colaborar na decoración da zona histórica para o próximo Arde Lucus.
As bandeiras xa comezaron a distribuírse, polo que en próximos días os locais xa as lucirán, podendo situalas tanto en interiores como en exteriores.
Cada local, como é habitual nas iniciativas de Lugo Monumental, abona as súas propias bandeirolas xa que a asociación non traballa con subvencións de ningunha clase. A Asociación abona os gastos de deseño e a coordinación da iniciativa, que pretende dar visibilidade á zona como punto álxido da festa de recreación.
