Lugo Monumental levará a cabo unha xornada coa participación da Plataforma de veciños Barrio Centro de Lugo, Adega Lugo e o Colexio de Arquitectos, colectivos que expoñerán a súa oposición aos proxectos municipais para a zona centro da cidade.
Levarán a cabo unha serie de actividades enfocadas a informar os lucenses e tamén a pedir o mantemento das zonas verdes.
Para os colectivos, é fundamental que o Concello abra á participación os proxectos que, como o chamado de “peonalización”, debátanse pública e colectivamente.
Haberá actividades para nenos, paneis informativos e intervencións explicativas.
A xornada centrarase no “malestar sobre os plans municipais de reformar o centro histórico, e destacadamente a Praza de Santo Domingo, para, seguindo os pasos doutros espazos como San Marcos, substituír as xa escasas zonas verdes do recinto amurallado por prazas duras”, unha reivindicación na que se sumaron varios colectivos.
Os puntos comúns dos distintos colectivos pasan poñer a participación como clave á hora de alterar un espazo público tan significativo como Santo Domingo, “moi vinculado tanto á vida diaria da cidade como á memoria colectiva e mesmo a personalidade de Lugo”. Suman tamén o mantemento de zonas verdes no centro histórico e mesmo o seu aumento sempre que sexa posible.
Para iso, hoxe mércores, entre as 19:00 e as 20:30 horas, fronte ao convento de Santo Domingo, levarán a cabo unha serie de accións en Santo Domingo. Haberá unha mesa informativa que explicará á xente o que pretende facer o Concello, con gráficos que demostren que “se quitará o verde e que pasarán coches por zonas que actualmente son peonís, como é o caso da illa peonil de Santo Domingo”.
Tamén haberá actividades para nenos consistentes en mesas de debuxo para que eles expresen a súa opinión sobre a retirada das zonas verdes.
O grafiado con xiz no chan de por onde irá o carril de circulación “para que o público se faga unha idea do que realmente supón o proxecto”, din.
En diferentes momentos intervirán representantes de diversos colectivos para dar a súa opinión e explicar o rexeitamento do proxecto desde diferentes prismas.
HORARIO
19:00 – Presentación e apertura da mesa informativa e a mesa de debuxo dos nenos
19:15 – Intervención dun representante da Plataforma de veciños Barrio Centro
19:30 – Intervención dun técnico da Plataforma de Veciños Barrio Centro
19:45 – Intervención dun representante de Adega Lugo
20:00 – Intervención dun representante do Colexio de Arquitectos.
20:30: Clausura da xornada
