A cesión dos terreos por parte da Tesourería Xeral da Seguridade Social fixo posible o acondicionamento deste edificio que integrará tanto a oficina do SEPE como a de emprego.
A subdelegada do Goberno en Lugo, Isabel Rodríguez, participou esta mañá no acto de inauguración da nova oficina de emprego e do SEPE no barrio de A Residencia, xunto coa alcaldesa de Lugo, Lara Méndez, o presidente da Xunta de Galicia, Alfonso Rueda, a conselleira de Promoción do Emprego e Igualdade, Elena Rivo, a directora provincial do SEPE na provincia e coordinadora territorial, Estefanía Pita, a directora provisional do SEPE na provincia, Ana Mª García Fernández e o director do INSS en Lugo, Juan José Rodríguez.
O Goberno fixo un investimento de 1.227.000 euros para a nova oficina do SEPE, realizando a cesión gratuíta dos terreos da antiga Escola de Enfermería no barrio de A Residencia a través da Tesourería Xeral da Seguridade Social. Esta cesión fixo posible o acondicionamento do edificio que albergará tanto as oficinas de emprego da Xunta de Galicia como as do SEPE, integrando esta última as dúas que están actualmente ubicadas na rúa Campos Novos e Río Cabe.
A subdelegada, Isabel Rodríguez, subliñou a importancia das dúas subvencións concedidas para este fin polo traslado de cada unha das oficinas, co obxectivo de adecuar e reformar as instalacións da cidade. “Esta financiación permite ter un novo centro de servizos de emprego moderno e eficiente en Lugo, esencial para a vida dos cidadáns”.
Tal e como explicou a semana pasada nunha visita ás novas instalacións, a achega do Goberno garante un acondicionamento axeitado das infraestruturas, solucionando problemas relacionados coa insuficiencia do espazo, tanto para persoal como para usuarios do servizo, a climatización, o mobiliario ou a mellora de sinalizacións e seguridade, entre outros.
Rodríguez aseverou na súa intervención que “o compromiso do Goberno do Estado coa mellora das infraestruturas na cidade e na provincia faise evidente tanto en materia económica como á hora de facilitar espazos para a posta en marcha de servizos mellorados nunha cidade que avanza en paralelo ás demandas que esixe a sociedade”.
Servizo esencial
O Servizo Público de Emprego Estatal é un organismo autónomo adscrito ao Ministerio de Traballo e Economía Social. O SEPE, xunto aos Servizos Públicos de Emprego das Comunidades Autónomas, realizan os trámites para prestacións por desemprego para 8.268 lucenses actualmente, así como a procura de emprego para os 12.190 persoas desempregadas na provincia.
