Este sábado tivo lugar en Monforte de Lemos a presentación dos proxectos da IX Edición do Concurso de Proxectos Empresariais Semente Ribeira Sacra, na que resultaron gañadores dúas iniciativas de Monforte.
O xurado, tras avaliar a presentación dos proxectos, decidiu outorgar o primeiro premio e os respectivos 10.000 euros a Chorima Cosmética Atlántica, unha iniciativa da Estrada para obter extractos vexetais para uso no sector da cosmética, mediante a Extracción Asistida por Ultrasonido.
En segundo lugar, quedou Lamas Dulce, que recibiu 6.000 euros. Un proxecto de galletas decoradas personalizadas, que nace como promesa á filla da promotora. Co obrador de Monforte de Lemos pretenden outorgarlle un toque personalizado e exquisito a calquera celebración, entregando as galletas en man ou a través de envío por mensaxería.
O terceiro premio de 4.000 euros foi para Bikarte, outra empresa monfortina. Unha empresa de alugueiro de bicicletas con servizo de visitas guiadas a través dunha App que permite coñecer roteiros diferentes con contido cultural, patrimonial, artístico e natural. Con Bikarte pretenden posicionarse no mercado de Turismo Activo a nivel nacional e internacional e ser un referente de empresa sostible e responsable co medio ambiente na Ribeira Sacra respondendo á necesidade de mobilidade alternativa ao transporte motorizado tradicional.
Impulsar novas iniciativas
A entrega dos galardóns e dos diplomas a todos os finalistas fíxose despois da cea de confraternidade celebrada no Parador de Monforte, na que participaron o que fora Conselleiro de Economía, Empresa e Innovación, Francisco Conde, que desde o comezo apoiou este concurso empresarial; a Directora Xeral de Emprendemento e Apoio ao Emprego, Margarita Ardao, Vicepresidencia da Deputación, alcaldes dos concellos que colaboran coa iniciativa e representantes das empresas e universidades que tamén a avalan.
Dende que botou a andar o concurso ten contribuído a impulsar máis dunha vintena de proxectos innovadores que dinamizan o medio rural e que, a partir do concurso, se converteron en realidade.
