Xa son moitos os comercios e os veciños e veciñas da Pobra de San Xiao de Láncara que se sumaron á iniciativa da veciña Patricia Sánchez para decorar os comercios e as vivendas con motivo do Samaín.
Así, veciñas como Eva e Vero xa decoraron as súas vivendas e comercios, defendendo que “a nosa comunidade de veciños unímonos á festa do Samaín”. No edificio de Eva xa decoraron a porta de entrada do seu piso, así como o corredor de entrada aos ascensores que levan ás vivendas individuais e Vero xa decorou o seu negocio.
Desta maneira, comerciantes, comunidades de veciños, asociacións e particulares de Láncara vanlle dando “vidilla” ás tradicións e festas, unha iniciativa que tamén apoia o Concello de Láncara, lembrando que os días 30 e 31 os comercios repartirán caramelos a todas as personas que leven algún complemento relacionado co Samaín.
O goberno local valora esta iniciativa de repartir caramelos e decorar os seus negocios e vivendas como unha “fantástica iniciativa do comercio local”.
