O vindeiro sábado día 2 de decembro, terá lugar, a cargo da Asociación de Campaneiro de Galicia, entre as 16.30 horas e as 17.00 horas un toque de campás conmemorativo do primeiro aniversario da Declaración do Toque Manual de Campás como Patrimonio da Humanidade pola UNESCO.
O toque será realizado por diversos membros da Asociación de Campaneiros de Galicia. O nome das campás da Catedral son Paula, Prima, Ronda, Petra, Esquilón, Campá do Sino, Esquilón Vello, Jernónima, Francisca e Calenda.
O toque manual de campás de Mondoñedo, Ponte Caldelas, Ponteceso e Boqueixón foi incluído na lista de manifestacións representativas o 1 de decembro de 2022.
Campaneiros de toda España, entre eles os galegos, contribuíron á consecución da declaración, xa que todos a avalaron con cartas de consentimento como representantes do saber deste oficio. En concreto, por parte de Galicia participaron Valentín Ínsua Palacios, da Catedral de Mondoñedo; Elías Darriba, de Campaneiros da Insua, en Ponte Caldelas; José María López, dos Campaneiros de San Fins do Anllóns de Ponteceso, e Víctor Curros, de Campaneros de Santa María de Lamas e Sergude de Boqueixón.
A tradición dos toques manuais de campás está presente en distintas partes de España e demostra a variedade de formas ao longo da xeografía española así como dos distintos tipos de toque. É un sistema de comunicación que se vén mantendo ao longo dos séculos como medio de expresión na vida relixiosa e civil. De feito, os toques, baseados no ritmo, tiveron historicamente un papel relevante á hora de organizar a vida comunitaria, delimitar o tempo e espazo laboral, festivo e de doo.
