Carballedo acolleu a última edición dos talleres para emprendedoras que a Federación de Asociacións de Mujeres Rurais (Fademur) imparte no marco do programa Ruraltivity.
Así, un grupo de mulleres emprendedoras da comarca de Chantada participou dunha sesión formativa sobre ‘Comunicación e habilidades dixitais’ na que se abordaron temas como as estratexias e ferramentas de comunicación dixital e a súa importancia á hora de promocionar e mellorar o desenvolvemento das ideas de negocio das emprendedoras rurais.
Este programa de acompañamento e asesoramento achega as ferramentas necesarias para que as emprendedoras rurais poidan sacar as súas ideas adiante e obter o mellor rendemento delas.
A lanzadeira de emprendedoras rurais de Fademur Ruraltivity está financiada polo Ministerio de Dereitos Sociais e Axenda 2030 e pola Fundación PepsiCo, que potencia a través deste programa iniciativas de autoemprego, facendo especial fincapé no emprendemento das mulleres nas zonas rurais.
