O Concello de Lugo presentou este venres na Feira Internacional de Turismo de Madrid, Fitur 2024, unha cidade ‘naturalmente irresistible’, a campaña coa que o executivo municipal aposta por un turismo de calidade e sostible. O delegado da área de Dinamización Económica e Relacións Institucionais, Mauricio Repetto, foi o encargado de presentar o novo spot da campaña, no que se pon en valor a riqueza patrimonial, gastronómica e paisaxística do municipio, así como as súas citas festivas máis emblemáticas: o San Froilán, o Arde Lucus e o Caudal Fest.
“Lugo combina todos os ingredientes para ser un destino turístico de calidade e non masificado, cun enorme potencial histórico e natural –con tres Patrimonios da Humanidade e inmerso na Reserva da Biosfera Terras do Miño– así como gastronómico, piares sobre os que estamos a traballar dende o Concello para transformar o sector, xerando produtos e experiencias turísticas innovadoras, ao tempo que desestacionalizamos a oferta para conseguir que cada vez máis visitantes nos veñan a coñecer ao longo de todo o ano”, explicou o edil.
Repetto fixo fincapé na relevancia da gastronomía na promoción turística de Lugo cidade e provincia, “non só pola calidade dos nosos produtos locais, senón tamén pola riqueza das receitas para a súa preparación por parte dos nosos cociñeiros e hostaleiros, de aí o lema: …E para comer, Lugo! amplamente recoñecido”.
Neste senso, apuntou que “a gastronomía é, ademais, o eixo central do Plan de Turismo Sostible que activamos desde o Concello de Lugo: ‘…Et edendo, Lucus: Un percorrido histórico pola enogastronomía’, un plan que desenvolveremos con fondos europeos da Estratexia Estatal de Recuperación, Transformación e Resilencia do Goberno central e para o que acadamos unha achega de 2 millóns de euros”.
“Dentro do programa desta estratexia –acordado cos axentes turísticos– converteremos un edificio emblemático, A Fábrica da Luz, nun centro de enogastronomía, que nos permitirá unha conexión da gastronomía desde a época pre-romana ata a actualidade”, subliñou Repetto.
Ademais, cobrará unha especial relevancia o traballo de investigación histórica e recuperación de actividades e oficios que tradicionalmente se podían realizar en Lugo vinculados á alimentación, recuperación de apeiros tradicionais (para cultivo, elaboración de alimentos etc.)/ etc.), embarcacións (batuxos para navegar e pescar polo Miño), etc.
Tamén se realizará unha recuperación de receitas que se perderon non tempo. “Boa parte deste material poderase utilizar como elemento expositivo na Fábrica dá Luz, converténdose non só nun centro para degustar especialidades enogastronómicas, senón tamén para ter unha participación activa potenciando experiencias e recuperando o legado que a cidade máis antiga de Galicia pode ofrecer”, destacou o concelleiro.
O Plan incluirá, así mesmo, accións de apoio ao emprendemento no sector turístico e unha ambiciosa estratexia de mercadotecnia e comunicación dixital, e o deseño de produtos que ensinen a nosa riqueza patrimonial a través da realidade aumentada, “o que nos permitirá chegar a todos os recunchos do mundo para dar a coñecer e convidar a visitar a nosa cidade: unha cidade naturalmente irresistible”, concluíu.
CONCELLEIRA DE CULTURA
A Concelleira de Cultura, Turismo e Promoción da Lingua, Maite Ferreiro, asistiu esta mañá á Feira Internacional de Turismo Fitur, onde Lugo amosou os seus encantos e a súa privilexiada situación, a través da campaña Lugo km100. Maite Ferreiro explicou que “o obxectivo deste ano non é novo, continuamos ensinando ao mundo a nosa riqueza cultural e patrimonial, o nosa hospitalidade e os nosos atractivos únicos que fan de Lugo un destino inesquecible para aquelas persoas que nos visitan”. A concelleira de Turismo afirmou na presentación que “os datos están xa a demostrar que esta campaña está dando os seus froitos, e Lugo estase a posicionar como un punto importante no turismo tanto polo patrimonio co que contamos como pola proximidade co resto de Galiza”.
Ferreiro insistiu en que Lugo pode ser o epicentro dunha experiencia maior, dunha viaxe e inmersión na Galiza para coñecela a fondo. “Temos a sorte de estar situados a menos de 100 km de lugares emblemáticos e representativos da nosa terra, polo que podemos ser a base de operacións para o desembarco na Galiza, para vivila enteira”, explicou Ferreiro, “Lugo Km100 é o comezo da viaxe, é o punto onde todo comeza e o fío que une un sin fín de experiencias”. A concelleira deixou claro que se está a afondar nesa idea porque funciona e os datos así o demostran, “pero sempre a través dun turismo de proximidade, responsable e de calidade”.
Para Maite Ferreiro “o máis difícil está feito”, xa que Lugo xa non é ese gran descoñecido, “Lugo xa está na boca e mente de cada vez máis xente, e aqueles que nos visitan, non nos esquecen”. “Pero hai que seguir camiñando cara o obxectivo, facer da nosa cidade un lugar ao que querer acudir para descubrir os seus tesouros”, insistiu a concelleira de Cultura e Turismo,
“Agardamos a todo o mundo cos brazos abertos e un sorriso, e animámosvos a coñecer o Lugo cheo de vida, moderno, afable, cómodo e acolledor que agarda por todas as persoas que nos visitan”, afirmou Maite Ferreiro durante a presentación, e engadiu “tratarémosvos da mellor das maneiras e acompañarémosvos mentres descubrides Galiza”.
