Despois do gran éxito das últimas xornadas viaxeiras (onde o pasado sábado se reuniron máis de 150 persoas na V xornada de Palas de Rei) a semana pasada tivo lugar en Rábade a presentación da sexta xornada viaxeira Descubrindo a Comarca de Lugo e as Terras da Ulloa con Guido Guía.
Remedios González (alcaldesa do Concello de Rábade), Lorena López (xerente do GDR 4 e do Xeodestino Comarca de Lugo e Terrras da Ulloa), e Guido Álvarez (impulsor do proxecto Guido Guía) anunciaron os primeiros detalles dun sábado 24 de febreiro no que volverán a reunirse historia, cultura, natureza, gastronomía e música tradicional.
Este proxecto engloba a 10 concellos das comarcas de Lugo e as Terras da Ulloa (Antas de Ulla, Castroverde, O Corgo, Friol, Guntín, Monterroso, Outeiro de Rei, Palas de Rei, O Páramo e Rábade) nos que nos vindeiros meses irán facéndose xornadas de presentación do que é un proxecto a longo prazo para poñer en valor as riquezas do territorio, e ao mesmo tempo promover vínculos sociais e culturais tanto de proximidade como con visitantes de máis lonxe que se animen a participar.
A inscrición para esta actividade é gratuíta, e pode facerse a través do correo info@comarcadelugo.gal e do teléfono 982 238 000
